Minister Dangui Oduber Den luna di april 2022 nos turismo a surpasa cifranan di april 2019! A registra un recuperacion di 108%

Minister Dangui Oduber

Den luna di april 2022 nos turismo a surpasa cifranan di april 2019! A registra un recuperacion di 108%

ORANJESTAD – E cifranan di turismo pa cu luna di april ta conoci y ta hopi alentador. Minister di Turismo sr. Dangui Oduber ta satisfecho con e luna di april a bay, surpasando tur espectativa. Den luna di april 2022 Aruba su turismo a surpasa cifranan di april 2019 cu tabata un aña record den turismo. Den luna di april a registra un recuperacion total di 108% den comparacion cu aña 2019.

Aruba su mercado mas grandi y importante cu ta e mercado Mericano a mira un recuperacion di 114% den april 2022 den comparacion cu april 2019. Aruba a ricibi den april 2022 un total di 101.696 turista compara cu e 93,953 turista den april di aña 2019. Esaki ta un crecemento di 7.743 turista.

Den aña 2021 Aruba a conoce un recperacion di 72% di su turismo den comparacion cu aña 2019 cu tabata un aña record pa Aruba su turismo. Den aña 2022 segun e pronosticonan di ATA Aruba lo yega 95% di su recuperacion compara cu 2019. Segun e mandatario no por descarta cu e cifranan aki lo por surpasa 100% di recuperacion den aña 2022,  si nan keda aumenta di e forma aki e lunanan nos dilanti.

Segun e mandatario ta importante pa remarca cu Aruba ta e di 2 pais na mundo cu a recupera su turismo di e forma aki. Esaki ta demostra e resiliencia di Aruba, e maneho cu Minister Oduber a bin ta hibando y e partnership y bon cooperacion den e sector turistico di parti Aruba Tourism Authority (ATA), Aruba Ports Authority (APA), Aruba Airport Authority (AAA), Aruba Hotel and Tourism Association (AHATA) y Aruba Time Share Association (ATSA) pa logra esaki. Minister Dangui Oduber ta sigui bay enfoca riba e cresemento di Aruba su turismo den cuadro cu e aña di recuperacion.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: