Subida alarmante di kasonan di violensia doméstiko
Presidente di Parlamento
Sra. C. America – Francisca
Wilheminaplein #4
Presente
Kòrsou, 9 di mei 2022
Tópiko: Subida alarmante di kasonan di violensia doméstiko
Apresiabel presidente di Parlamento sra. America,
Durante e último simannan aki tabatin vários kaso di violensia doméstiko. E kasonan aki a keda ampliamente presentá den medionan di komunikashon i ta konosí pa komunidat kompleto. E subida di e kasonan di violensia ta di preokupashon. E ta pone un preshon sosial – emoshonal riba nos komunidat i ta eksigí mas di kuerpo polisial i NGO’s ku ta traha den e sektor aki.
Violensia ta un di e indikadónan di malestar sosial den un komunidat, komo ministerio responsabel pa salú sosial di nos pais, ta importante pa e Minister di SOAW indiká na Parlamento kua ta su plan di akshon pa loke ta trata kasonan di violensia.
Na aña 2018 Ministerio di Asuntunan Sosial, Labor i Bienestar (SOAW) a presentá e ‘plan Nashonal Kontra Violensia Doméstiko i abusu mucha’, na Parlamento i komunidat kompleto. Den e plan tantu Gobièrnu, komo fundashonnan sosial a yega na akuerdonan konkreto kon lo enkaminá un plan di prevenshon, kaminda por medio di informashon i edukashon lo konsientisá komunidat. E implementashon di e plan aki a kuminsá ku diferente proyekto di informashon, entre otro “ Bo no ta bo so”.
Frakshon di PAR den un reunion di komishon sentral lo kier deliberá ku Minister di SOAW kon e implementashon di e plan aki ta kanando. Ademas kua ta e akshonnan ku Minister Larmonie konkretamente a tuma pa mitigá violensia den nos komunidat.
Hasiendo uso di artíkulo 33 di reglamentu di òrdu, frakshon di PAR ta pidi Presidente sra. America-Francisca pa yama un reunion di komishon sentral, ku e tópiko ariba menshoná i alabes invitá minister di Asuntunan Sosial, Labor i Bienestar sra. Larmonie pa e ta presente na e reunion aki.
Danki di antemano,
Miembronan di Parlamento, Partido Alternativa Real