Site icon

MINISTER LARMONIE-CECILIA A DUNA INISIO NA KURSO PA VIGILANTE SPESHALISÁ PA TRAHA DEN SEKTOR DI HOSPITALIDAT ORGANISÁ PA IPE I CHATA

Advertisements

 

Willemstad 10 di Mei 2022- Resientemente Institute for Professional Excellence (IPE) i Curaçao Hospitality and Tourism Association (CHATA) a inisiá e kurso speshal pa vigilantenan ku ke traha den industria di turismo i horeca. Minister enkargá ku Desaroyo Sosial, Labor i Bienestar, Señora Ruthmilda Larmonie-Cecilia a hiba palabranan di enkurashamentu na e kursistanan i asina a duna inisio na e kurso.  Esaki ta e promé di un seri di kurso ku CHATA i IPE ta bai organisá pa asina forma vigilante i housekeeping den sektor di hospitalidat.

E formashonnan ofresé pa IPE i CHATA ta yena netamente e bashí ku ta eksistí pa fishi i profeshonnan di kual ta mustra ku lo tin mas mester di dje den futuro serkano.  E durashon di e kurso lo ta di un luna i mei.

 

E rekupershon di nos turismo i desaroyonan pa trese mas opshon di estadia, ta trese ku’né un subida signifikante pa loke ta trata oportunidat di trabou pa komunidat di Kòrsou den diferente funshon den hospitalidat. Un di e funshonnan ku ta sumamente importante ta e funshon di vigilante ku tin konosementu di e importansha di turismo pa nos isla, i noshon di kon kardinal protekshon di e imáhen di nos pais ta, pa Kòrsou por mantené un sektor di turismo ku lo sigui krese i floresé.  E funshon di Vigilante den e area di hospitalidat ta importante pa e bishitante por tin un estadia safe, pa demas empleadonan den sektor por laborá ku e trankilidat ku nan ta proteha, i e alokashon por keda ofresé un eksperensha positivo riba nos isla.

Por spera mas formashon ofresé pa IPE i CHATA durante di e próksimo periodo.  IPE ta ofresé programanan di rekapasitashon i optimalisashon di konosementu riba tur nivel pa optimalisá abilidatnan spesífiko importante pa prepará e profeshonal pa e djòp di futuro.  Pa mas informashon por manda un e-mail na info@ipe.cw.

Exit mobile version