PROMÉ MINISTER GILMAR PISAS A hasi un bishita na e kompania estatal di elektrisidat na Costa Rica

Willemstad – Promé Minister Gilmar Pisas a hasi un bishita na e Kompania Estatal di Elektrisidat (ICE) na Costa Rica dia 9 di mei 2022.

 

ICE ta un kompania estatal ku ta atministrá esklusivamente e sistema di elektrisidat. E kompania a logra un kobertura di koriente nashonal di 99.4 % ku un matrix energétiko di mas di 95 % renovabel.

E kompania di elektrisidat aki ta promové i fortalesé un modelo basa riba sostenibilidat i e akseso universal di elektrisidat, huntu ku e rekursonan natural den kompleto harmonia ambiental.

E ta destaká tambe komo un modelo den termino di kobertura, efisiensia i inklushon sosial.

 

Costa Rica a destaká komo un país ku a amplia e servisio públiko den un forma hopi efisiente. A ekstendé e servisionan di elektrisidat i además esun di awa, salubridat  i edukashon den tur sektor sosial i tur e regionnan di e país.

 

Durante di e bishita a duna Promé Minister sr. Pisas un presentashon den kual a splika kiko ta e funshon di e kompania, kiko tur a hasi pa yega na e éksitonan ku nan ta kosechando, i informashon riba e 7 planta i sistemanan for di unda ta generá elektrisidat.

 

Promé Minister a keda hopi satisfecho pa ku e presentashon ku e la risibí i a indiká ku e lo pone su kolega Minister di Desaroyo Ekonómiko sr. Ruisandro Cijntje na altura di esakinan.

 

E bishita aki tabata unu kaminda por a tuma nota di diferente forma di generá elektrisidat.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: