PROMÉ MINISTER GILMAR PISAS tabatin un reunion ku e minister di enseñansa nobo di Costa rica

Willemstad – Promé Minister Gilmar Pisas tabatin e honor di reuní ku e Minister di Enseñansa nobo di Costa Rica sra. Anna Katharina Müller Castro (Ministro del Ministerio de Educación Pública (Maestría en Educación con Especialidad en Teoría y Práctica de Curriculum para la Enseñanza Secundaria, Universidad Federal de Santa María, Brasil) dia 9 di mei 2022.

 

Durante di e reunion aki Promé Minister sr. Pisas a informá e minister ku e lo bai bishitá e studiantenan di Kòrsou ku ta studiando na Costa Rica i ku despues lo aserká Minister sra. Müller Castro ku e resultado di e bishitanan aki.

Promé Minister sr. Pisas a duna Minister sra. Müller Castro e oportunidat amplio despues pa splika su maneho.

 

E filosofia di Minister sra. Muller Castro ta pa traha huntu, den ekipo, i restrukturá henter e sistema di enseñansa ku tin aktualmente.

E ke skohe entre otro un skol den kada un di e distriktonan di Costa Rica (27 total) komo un skol di modelo kaminda lo trese kambio riba e parti sosial i no esun di kuríkulo ainda. E ke logra esaki mas pronto ku ta posibel.

E ta traha ku skolnan públiko i su intenshon ta pa sentralisá esakinan, debí ku segun e, mester tene kuenta ku tin muchu mucha den un klas i esaki ta pone ku no por atendé ku e muchanan di un forma apropiá.

E ke pa famianan di e studiantenan haña mas konfiansa den e sistema di enseñansa i tambe krea un komunidat ku ta mas responsabel pa e skolnan.

Algun deseo mas di dje ta pa laga e muchanan hasi mas ehersisio físiko i traha riba kapasidat di e maestronan.

 

Su meta kardinal ta pa traha hopi di aserka ku su koleganan Minister di Salubridat i Minister di Deporte, pa asina huntu nan por dileñá un maneho ku ta kubri tur e nesesidatnan di e muchanan na skol.

A sigui elaborá riba hopi punto mas, ku ainda no por keda públiká, ku debí ku ta resientemente e la tuma mando di e ministerio aki.

 

 

Promé Minister sr. Pisas a keda hopi kontentu ku tur loke ku e la risibí na informashon i a bisa Minister sra. Müller Castro ku e lo kompartí tur esakinan ku Minsiter di Enseñansa, Siensia, Kultura i Deporte di Kòrsou, sr. Sithree van Heydoorn.