Site icon

E tim di asesinato (cold case) ta investigá puntonan di konekshon nobo ku morto di Sedar Soares

Advertisements

 

KOMUNIKADO DI PRENSA 255/2022
19 mei 2022
E tim di asesinato (cold case) ta investigá puntonan di konekshon nobo ku morto di Sedar Soares
Departamentu di Komunikashon i Prevenshon

KUERPO POLISIAL KÒRSOU SIRBI I PROTEHÁ
E tim di asesinato (cold case) di polis na Hulanda unidat di Rotterdam a hasi un paso
importante den e investigashon pa ku e morto di Sedar Soares di 13 aña di edat. Pa hopi
tempu a pensa ku lo a tira e mucha hòmber mata pa tira bala di sneu riba un outomobilista.
Awor e tim di asesinato ta sali for di e punto di bista (senario) ku Sedar ta kompletamente
inosente i ku ta pa kasualidat el a bira víktima di un ‘ripdeal’. Polis no por hasi nada otro ku
yega na e konklushon tristu ku Sedar tabata na e lugá robes na e momentu robes.
‘Ripdeal’
Dia 1 di febrüari 2003 Sedar i su amigunan tabata hunga riba e lugá di parker ariba di e
stashon di metro Slinge. E dia ei sneu a kai i e muchanan hòmber tabata gosa ku esaki. Ta
sospechá ku na sierto momentu lo a tira for di e kaya bou di e lugá di parker. E muchanan
hòmber ta buska refugio, pero pa Sedar ya ta lat. Un di e balanan tirá ta alkans’é, i e ta
fayesé un dia despues 2 di febrüari den hospital debí na su heridanan.
E tristesa i indignashon na e momentu ei tabata grandi. Pa e famia i amigunan di Sedar
ainda esei ta e kaso. E kontesta riba e preguntanan di kiko i dikon el a sosodé nunka nan a
haña. Un mucha hòmber lo a ser tirá pasó el a tira bala di sneu riba un outomobilista.
E tim di asesinato awor ta sali for di un otro punto di bista (senario). Ta sospechá ku na
momentu ku Sedar i su amigunan tabata hunga na stashon di metro, un ‘ripdeal’ a tuma
lugá di kua Sedar lo a bira e víktima. E tim no por hasi nada otro ku yega na e konklushon
tristu, ku Sedar tabata na e lugá robes na e momentu robes.
A dura sufisiente
E tim di asesinato (cold case) di polis na Rotterdam nunka a laga e kaso bai. Na 2020 a trese
e kaso bou di atenshon di públiko atrobe, tambe dor di e kalènder di kasonan di asesinato i
atenshon nobo den prensa. Esei a hiba kuné ku tòg mas testigu a aserka polis ku
informashon tokante e echonan. Nan ta haña ku a dura sufisiente, e famia tin derechi di sa
e bèrdat. E testigunan a kompartí e informashon ku nan tin ku reshèrshi. E tim di
investigashon a añadí e testimonionan nobo, adishonal aki na e fail eksistente. E
kombinashon di loke a haña den investigashon anteriormente i e deklarashonnan nobo di
testigunan a kondusí e tim di asesinato awor na un punto di bista (senario) nobo den
investigashon pa ku e morto di Sedar Soares. E investigashon for awor tambe ta
kompletamente dirigí riba e senario aki.
E kancha (speelveld) di testigunan a bira mas grandi
E echo ku e investigashon awor ta dirigí kompletamente riba un senario nobo, ta nifiká
tambe ku e tim di asesinato lo kier drenta kontakto atrobe ku testigunan. Lòs for di e
testigunan (kasual) di e tiroteo, tin e espektativa ku tin testigunan tambe ku tabatin i tin
informashon tokante e ‘ripdeal’. Mester tin mas hende ku tin informashon di loke a sosodé
promé, durante i despues. Nos ta realisá ku tin rason dikon personanan kisas no a konta
nan historia (kompletu) e tempu ei. E speransa ta ku e situashon a kambia pa e personanan
aki, ku ta pone ku awor si nan lo ke konta nos. E fiskal mayó di hustisia di Ministerio Públiko
na Rotterdam a oumentá e rekompensa pa e tep ku ta hiba na solushon di kaso na
€40.000,-.
Na mes momentu e tim ta realisá ku tambe por tin testigu ku no ta sinti nan mes liber pa
konta abiertamente. Pa e motibu ei a habri un number di telefòn spesialmente pa nan den
e investigashon aki. Bo ke hasi bo deklarashon na un manera seif, ku bo e kulpabel no ta
haña sa bo nòmber? Bèl òf app e tim di testigu speshal na +31620740912.
Pasó e kaso ya tin añanan bieu, por ta asina ku mester buska e informashon mas leu di
kaminda e suseso a tuma lugá. Tin indikashonnan fuerte ku denter di e komunidat Antiano
tin informashon konosí di e kaso. Ta hasi un apelashon ku énfasis riba e personanan aki pa
reakshoná i mèldu nan mes. Si bo ta duda, en todo kaso papia ku polis tokante esaki. Tin
posibilidat pa hasi esaki na islanan Antiano tambe.
Por hasi kontakto direkto ku e tim di asesinato na Rotterdam dor di yama e liña di
investigashon pa duna tep, 0800-6070. Òf manda un mail na coldcase@politie.nl
Dokumental
Den e tempu binidero e tim di investigashon ta hasi tur kos pa yega na kontestanan den e
kaso aki. Te ku awor a hasi uso di tur medio di komunikashon aplikabel pa alkansá
testigunan importante. Den e wikènt binidero ta lo bai hasi un paso remarkabel den kuadro
di esaki. E morto violento di Sedar ta rekerí pa move fronteranan den área di investigashon.
Nunka promé a hasi un intento di e manera aki pa konvensé hende di e echo ku nan
informashon por kontribuí na solushon di e asesinato aki. E tim ta ferwagt ku asin’aki tòg
por gana e testigunan importante ei.
Den e 19 añanan ku e investigashon ta andando, e medionan pa hasi investigashon tambe a
desaroyá. Asina aworakí nos ta hasi uso di téknikanan mas moderno ku e tempu ei. Aki nos
ta konta mas tokante e dokumental “Papia! Awor!” ku lo keda transmití djadumingu 22 di
mei pa 21.55 or na NPO1 (WNL). Den e dokumental aki bo ta haña un bista den kushina di e
tim di asesinato (cold case) di polis na Rotterdam. Lo bira kla kon e tim di asesinato (cold
case) no por yega na un otro konklushon ku Sedar tabata na e lugá robes na e momentu
robes.
Reakshon di famia
E famia di Sedar ta laga sa pa medio di un bosero: “Ainda nos ta sinti Sedar su falta tur dia.
Nos yu hòmber, ruman, subrino tabata na e momentu robes ku su amigunan na e lugá
robes. Nos ta hopi kontentu ku polis ta duna atenshon kompletu atrobe na su morto. I nos
ta gradesido na un i tur ku a kontribuí pa hasi e proyekto speshal aki posibel. Sedar tabata
un mucha hòmber kariñoso ku tabatin hopi gana di bira hungadó di bala i no tabata hasi
niun hende daño. Nos ta spera ku personanan ku sa mas lo kier mèldu na mes apesar di
tantu aña ku a pasa. Esaki lo duna tur hende ku stima Sedar hopi pas. Na mes momentu nos
ta spera ku prensa i otronan lo respetá nos privasidat den e tempu binidero. E pèrdida di
Sedar ainda ta hasi doló tur dia. A rekerí hopi di nos pa kontribuí na e dokumental.
Gustosamente nos ta deseá di sigui desaroyo di e investigashon den seno familiar i lo no ta
disponibel pa entrevistanan òf otro petishonnan di prensa.”

 

Exit mobile version