Site icon

Mas gol nos hinka mas chèns abo tin pa gana: AQUALECTRA TA SOSTENÉ TIM KÒRSOU DEN E WEGA KONTRA AJAX!

Advertisements

Willemstad 19 di Mei 2022 – E partido entre tim Kòrsou i AJAX ta pinta di bira sentro di atenshon pa nos komunidat djabièrnè anochi. Aqualectra ta kere firmemente ku na momentu ku nos mes hendenan ta sostené otro i duna e aporte nesesario, nos ta yuda kontribuí konhuntamente na un energia positivo den nos komunidat. Esaki ta inspirá i motivá tambe nos hóbennan pa praktiká deporte i ku chèns di logra nan soño bira realidat. Aqualectra p’esei ke kontribuí na kontagiá nos komunidat ku e “vibe” positivo di sosten na nos ekipo. Aqualectra lo rifa premio èkstra, den kuadro di su kampaña Mi Aqualectra Digital, durante di e partido. Kada gol ku tim Kòrsou hinka ta nifiká chèns pa abo gana un ‘jersey’ outéntiko di AJAX pa mucha, mas un kupòn di ANG 500 na krédito pa awa, koriente òf komestibel. Por partisipá na e rifa spesífiko aki dor di suskribí òf ‘update’ bo informashon personal riba MiKuenta durante e durashon di e partido. Pa partisipá ta fásil. Djis bishitá Aqualectra.com durante di e partido i sigui e instrukshon.
Aqualectra su empeño ta pa kontribuí fundamentalmente na bienestar di komunidat. Esaki ke men ku ta sostené e tipo di esfuersonan aki ku ta krea un energia positivo den nos komunidat. Banda di esaki e partido ta kontribuí na eksponé nos isla i nos talentonan serka e fanatikada grandi di futbòl na Hulanda. Ta bunita oportunidat pa atrobe nos demonstrá ku pa medio di union i solidaridat nos ta yuda engrandesé e logronan di nos pais. Aqualectra kier invitá komunidat di Kòrsou kompletu pa ban sosten’é tim Kòrsou, i alabes partisipá pa gana premio ku e kampaña speshal di Mi Aqualectra Digital pa e partido di Kòrsou kontra AJAX. Kòrda ku kada golaso ta nifiká un premio, djis pasó nos ta kere ku tim Kòrsou por! I si akaso nos tim Kòrsou no logra hinka gol, tòg Aqualectra lo rifa un premio pasó nos ta orguyoso di nos embahadornan deportivo.

 

Exit mobile version