Departamentu di Agrarisch en Visserij Beheer (AVB) a bishitá piskadónan di Playa Kanoa pa tende nan puntonan di atenshon


Willemstad – Departamentu di AVB (ántes LVV) a tuma nota di e inkietutnan ku piskadónan di Playa Kanoa a ekspresá den medionan di komunikashon. Den e kuadro aki hefe interino di AVB señor Frensel Marchena i dos kolaboradó a bishitá e playa djamars mainta 24 di mei pa papia ku e piskadónan i duna atenshon na nan inkietutnan. Señor Marchena a mustra ku e inkietutnan aki no a yega ofisial serka AVB. AVB ya kaba tin e intenshon pa atendé algun punto na Playa Kanoa, esaki despues ku terminá ku e proyektonan na Piskadera i Caracasbaai.

E puntonan di atenshon ku e piskadónan a trese dilanti ta ku mester drecha parti di e dak di e kas di piskadó, drecha tambe rant di e waf kaminda laman ta dal i adaptá e slipway pa boto mas grandi. Señor Marchena a mustra ku lo tuma kontakto ku Obranan Publiko pa konseho relashoná ku e waf. Pa dak i e slipway ta bai hasi ehersisionan den e departamentu pa eksplorá e posibilidatnan pa atendé ku esakinan. E waf tabata den bon estado, pero naturalesa a hasi daño rápido na esakinan. E slipway tambe a konstruí den estrecho koperashon ku piskadónan i e tempu ei nan no tabatin boto grandi. Awor si esaki ta e kaso, pero AVB no a risibí petishon pa adaptá esaki.

Apesar ku ladronisia i vandalismo ta stroba desaroyonan, e kas di piskadó na Playa Kanoa a haña hopi atenshon di gobièrnu. Na aña 2013 Ministerio di GMN a drecha e kas di piskadó i e waf i a rekonstruí e pier i e slipway. Den e periodo aki mes ladronnan a hòrta e dak nobo i tur sanitario. Tambe a draga (koba) na aña 2019 pa hasi e laman mas profundo. Ta hopi importante pa e pier i slipway ta den bon kondishon pasobra den kaso di un emergensia riba laman na parti Nòrt, Playa Kanoa ta e úniko sitio kaminda por baha ekiponan di reskate na laman. Ta evaluando posibilidat pa pone koriente i kamera solar pa kombatí ladronisia i vandalismo.

 

This site uses Akismet to reduce spam. Learn how your comment data is processed.

%d bloggers like this: