Site icon

Petishon pa reunion públiko ku karakter di urgensia riba un kantidat di 29.330 kilo di produktonan kaduká riba merkado

Advertisements

Willemstad, 19 di mei 2022

 

Presidente di Parlamento di Kòrsou

Señora  Charetti M. America-Francisca

Wilhelminaplein # 4

Presente

 

Tópiko: petishon pa reunion públiko ku karakter di urgensia riba un kantidat di

             29.330 kilo di produktonan kaduká riba merkado

 

 

Señora Presidente,

 

Pa medio di e karta aki suskritonan di Frakshon di Movementu Futuro Kòrsou (MFK) enkaresidamente ke pidi bo atenshon pa lo siguiente:

Resientemente Frakshon di MFK por a tuma nota den medionan di komunikashon ku a bin deskubrí (karni) kaduká i mas otro produktonan,warda den vrizernan,mas ku dos aña kaba. Ta trata aki di un establesimentu renombrá, i ku no ta di promé biaha ku ta gara nan ta hasiendo e tipo di infrakshonnan asin’aki den nos pais.

 

Nos Frakshon por a tuma nota di e echo ku funshonarionan di MEO i GMN manera ta stipulá i konforme nos leinan, reglanan i prosedura a bai hasi nan kòntròl dirigí na e establesimentu enkuestion. Durante último tempu e departamentu di “Handhaving” a bin ta hasiendo un gran trabou  den kontrolá pa wak ku establesimentunan ta kumpliendo ku reglanan di salubridat públiko. Den e kaso aki a bin deskubrí no ménos ku 29.330 kilo di produktonan kaduká, ku tabata di añanan  2019 i 2020. E funshonarionan a bin topa produktonan kaduká manera e.o. karni, diferente tipo di pan, eiskrim, pasapalu, i hopi mas. Nunka e tim di Kòntròl no a yega di topa e kantidat di produktonan aki.

Ku esaki nos por konstatá ku esaki a forma un peliger mayor riba nos isla, pa motibu ku e lugá aki ta un ‘Horeca-lokaliteit’ i ta repartí nan produktonan na diferente lugánan rònt Kòrsou manera restorantnan, snack etc. etc.

 

Den e  ‘Warenlandsverordening’ ta mustra den artíkulo 24 riba posibilidat di sanshon, kual ta den man di e Minister enkargá ku salu públiko. E Minister enkuestion mester laga traha un rapòrt riba lokual ku a tuma lugá pa despues por hasi denunsia na Ministerio Públiko, i pone hendenan responsabel di moda ku por imponé sanshon nan severo na tur esnan ku di un òf otro manera a hasi nan mes kulpabel na aktonan kastigabel kontra e komunidat di Kòrsou.

 

Sra Presidente, konforme artíkulo 64, insiso 4 di Reglamentu di Òrdu di Parlamento suskritonan ta serka bo persona pa yama un reunion públiko ku karakter di urgensia ku e tópiko ariba menshoná. Pa e reunion aki nos ta pidi ku ministerio di GMN manda promé ku e reunion tur dokumentunan nesesario i relevante pa nos Frakshon i nos ta pidi tambe presensia di Minister di Salubridat, sra. D. Pieters-Janga pa ta presente na e reunion.

 

Atentamente,

Amerigó Thodé                         Juniël Carolina                          David Seferina

 

 

Exit mobile version