Minister Pietersz- Janga a enkargá su ministerio pa formulá un plan di akshon pa garantisá kalidat di kuido den salubridat
Minister Pietersz- Janga a enkargá su ministerio pa formulá un plan di akshon pa garantisá kalidat di kuido den salubridat
Willemstad – Resientemente Minister di Ministerio di GMN dr. Dorothy Pietersz- Janga a keda sorprendí di mira un entrevista den kua ta reklamá un situashon alarmante na Betesda. Inspekshon di Salubridat tambe a tuma nota di e reklamo i basá riba un investigashon ku Inspekshon a hasi a informá Minister ku no a konstatá nada di e notisianan den prensa. Minister Pietersz- Janga mes a akudí tambe na e instituto pa averiguá personalmente kiko ta e situashon real i pa papia ku maneho di e instituto i ku e médikonan.
For di e bishita di Minister Pietersz- Janga i e investigashon di Inspekshon no por a konkluí ku tin iregularidat pa loke ta e kalidat di kuido den e instituto ku mester di un medida spesial di parti di Minister i Inspekshon. Inspekshon di su parti a mustra ku lo keda vigilá e situashon i lo tene Minister na altura di kualke desaroyo. Aunke Ministerio di GMN tin basta dia kaba ta atendé ku institutonan den kuido, Minister Pietersz- Janga a duna su ministerio enkargo pa traha riba un plan di akshon pa garantisá kalidat di kuido den salubridat, prinsipalmente den e sektornan mas vulnerabel kual ta e institutonan di kuido supsidiá pa gobièrnu.