Site icon

Presidente di Parlamento di Korsou: Charetti America – Francisca 𝗡𝗼𝗺𝗯𝗿𝗮𝗺𝗲𝗻𝘁𝘂 𝗣𝗼𝗹𝗶́𝘁𝗶𝗸𝗼

Advertisements
Mi deseo sinsero ta pa tur hende tin un fuente di entrada digno. No solamente pa nan sostené nan mes òf kria nan famia, pero tambe paso mi sa e diferensia entre produsí pa bo mes i dependé di un otro.
Apesar di esei mi ta kontra nombramentu polítiko den e siguiente kasonan :
– Kaminda ta rekerí un proseso di solisitut habri, ku ta duna tur hende e mes un chèns sin importá pa ken nan a vota.
– Kaminda e persona nombrá ta keda atras den e aparato públiko asta ora e polítiko mes no tei mas.
– Kaminda e ta evidente ku e persona no ta kualifiká pa e funshon ku e ta aspirá. Yuda un persona no por kosta e pais su futuro.
Komo polítiko mi ta konsiente ku tin funshonnan asina serka di bo,ku ta rekerí un hende di bo konfiansa.
Den kaso nan asina un nombramentu polítiko mester ta mara na bo persona i e konfiansa.
E palabrashon hopi kla i transparente mester ta ku ora bo no ta den funshon mas òf e persona no ta gosa di bo konfiansa mas e nombramentu ta kaduká.
Pa lei parlamento por tin 40 persona den servisio. Riba su mes e ta un milager ku 40 persona ta hasi tur e trabou ku ta sosodé.
Ta pa e motibu ei, bo ta haña kombinashon di funshon, kaminda un persona ta responsabel pa mas ku un área.
E mihó manera pa balorá e trabou di e 40 hende nan aki ta, dor di no nombra hende ku no ta kualifiká i ta bai hasi nan trabou mas difísil.
Ta bon tambe pa nos keda kòrda ku parlamento no ta gobièrnu. Ami no ta minister, mi ta presidente di parlamento.
1. Parlamento por bini ku inisiativa nan di lei ku por krea mas kupo di trabou.
2. Parlamento por kontrolá si gobièrnu ta kumpli ku su programa di gobernashon i krea mas kupo di trabou.
3. Parlamento no por sinta riba stul di gobièrnu òf un minister i tuma desishonnan ehekutivo.
Mi no ke bai sin bisa esaki, no kansa di lesa, ta un pueblo informá por opiná. Ignoransia ta nos pió enemigu.
Un nombramentu polítiko no pa definishon ta malu òf robes.
Elekshon ta reflehá e deseo di un pueblo i ta tradusí su mes den un mandato. E mandato aki ku e polítiko ta risibí dor di e konfiansa di e pueblo, ta pa ehekutá su promesa nan, maneho i ideologia.
E promesa, maneho i ideologia ta e partido su polítika nan.
Hopi biaha pa ehekutá e polítika nan aki, ta rekerí un hende ku tambe ta kere òf por karga e polítika nan aki. Manera mi a bisa mas ariba e nombramentu e ora ei mester keda mara na e tempu ku e polítiko ta den funshon òf e polítika (maneho,promesa,ideologia) ta vigente.
Loke nos mester resistí ta “klientelismo” òf patronahe polítiko.
Kiko ta “klientelismo” : E tendensia pa faboresé, sin e hustifikashon nesesario, un persona òf organisashon, pa haña su sosten den futuro.
Patronahe polítiko : Lamentablemente ainda tin hende ta kambia nan voto pa risibí un fabor di e polítiko. Pero e gran mayoria no ta partisipá den esaki. E gran mayoria sea pa desepshon òf konsenshi a bira mas sabí i konsiente di e balor di nan voto. Loke si ainda ta atraktivo ta un funshon komo empleado públiko. Esaki ta un ehèmpel di patronahe polítiko. Un nombramentu asina lo pone ku e empleado públiko su lealtat ta keda na un partido en bes di su pais.
E desgrasia di e pais ta bira ku ni maske kon bon bo idea komo polítiko ta, e no ta wòrdu ehekutá.
Esaki nan tur ta elementonan ku ta kome nos pais di paden i ta mina nos demokrasia.
Tin hopi demanda riba mi tempu pero lo mi sigui purba kompartí mi opinion ku bo.
Pa abo ku ta lesa pa promé biaha, no ta awe mi a kuminsá papia, djis buska e hashtag ; #EKamindaTaLargu of #NosTaYegaSi i lo bo mira tur mi kontribushon nan durante di e último aña nan.
Mi kompromiso ta ku bo.
Exit mobile version