Charetti America – Francisca 𝗞𝗼𝗺𝗶𝘀𝗵𝗼𝗻 𝗗𝗼𝗺𝗲́𝘀𝘁𝗶𝗸𝗼

Diferente hende a manda esaki pami awe kaba.
Mi ta komprendé boso preokupashon, pero keda trankil.
Ta bon pa bo sa ku e asuntu di lista di desishon a keda trata kaba, i for di inisio mi a informá ku transparensia ta mi kuki. Dus pa publiká un lista di desishon nan sigur lo no ta problema.
Loke mi a agregá aserka na e petishon aki ta, pa tur komishon i no solamente e komishon doméstiko publiká un lista.
Komo ku esaki ta algu interno, nos tabata trate interno tambe. Pero pa evitá ku nos ta drenta un siman nobo di spekulashon mi ta kompartí esaki ku bo tambe.
E parti di bai korte manera mi a komprendé no ta riba e publikamentu di lista di desishon.
Si ta pa esei mes, e lo ta obsoleto mirando ku ya a disidí ku e lista ei ta bai wòrdu publiká. Loke mi a komprendé ta ku ke bai korte pa wak ken por nombra personal den e aparato públiko di parlamento. Si ta e komishon doméstiko manera a sosodé semper òf no.
Riba su mes baimentu di korte no mester spanta niun hende. E no ta kontra e persona, den e kaso aki ami komo presidente, sino pa haña klaridat.
Si tin algu ku mi a ripara entre huristanan ta e diferente interpretashon ku tin entre nan mes. Ami no a skohe e kaminda di korte pa haña klaridat, mi a skohe pa laga hurista nan ku no tin interes den e asuntu aki duna un konseho, ku nos tur ta pendiente di dje.
Lo mi tene bo informá di e desaroyo aki, promé ku bo wòrdu bombardiá ku un dosis di bòmbòshi i spekulashon e siman aki tambe.
Ta bon pa bo sa tambe ku e komishon doméstiko di parlamento ku mi ta presidí, ta konsistí di tantu miembro di oposishon komo koalishon. Diskushon nan ku tuma luga eiden, pa lei tin un karakter sekreto.
Naturalmente tur hende tin nan manera di hasi politika, i mi ta respeta esei.
Loke ta importante pa mi ta pa nos no trese intrankilidat inesesario den nos komunidat. Nos tin hopi reto ku ta rekeri tur nos atenshon.

This site uses Akismet to reduce spam. Learn how your comment data is processed.

%d bloggers like this: