google.com, pub-5639114718427035, DIRECT, f08c47fec0942fa0

Prome Minister Evelyn Wever-Croes: Segun e ultimo Economic Outlook di Banco Central: Aruba a recupera positivamente despues di un periodo economico dificil debi na e pandemia mundial

 

Prome Minister Evelyn Wever-Croes:

 

Segun e ultimo Economic Outlook di Banco Central:

ARUBA A RECUPERA POSITIVAMENTE DESPUES DI UN PERIODO ECONOMICO DIFICIL DEBI NA E PANDEMIA MUNDIAL.

 

Economia di Aruba ta recuperando positivamente den e ultimo añanan despues cu nos pais a pasa den un temporada sumamente dificil debi na e pandemia mundial cu a afecta Aruba tambe. Esaki por ser destila for di e ultimo publicacion di Banco Central, esta e ‘Economic Outlook’ di juni 2022.

 

RECUPERACION FUERTE DI NOS TURISMO

Den e publicacion aki a resalta cu e expansion di e actividadnan economico den 2021 pa gran parti tabata debi na e recuperacion fuerte di nos turismo. Si na 2020 e Producto Domestico Bruto (PDB) den termino real a cay cu 18.6%, na 2021 esaki a crece cu 17.2%, cual ta un desaroyo sumamente positivo pa nos pais. 

 

VISION Y DETERMINACION 

E logro aki no tabata posibel si no tabata pa e vision y determinacion di gobierno cu a implementa e programanan di subsidio di salario y FASE cu a yuda pusha e consumo priva den un periodo sumamente dificil pa nos pais. Como consecuencia di esaki, e consumo priva cu tabata negativo na 2020, esta -10.9%, na 2021 esaki a bira positivo atrobe, 8.8%. Alabes e aumento di inversion priva a hunga un rol importante den henter e crecemento economico aki, esta for di -16.1% na 2020 pa 2.3% na 2021. 

 

CRECEMENTO ECONOMICO REAL DI 2.1% Y CASO OPTIMISTA DI 5.3%

Otro componentenan importante den henter e desaroyo positivo aki ta exportacion y importacion cu tambe a crece substancialmente den 2021 compara cu 2020. Y en especial e exportacion di nos turismo lo bay ta e driver principal pa nos crecemento economico den 2022. Proyeccionnan actual ta mustra cu na 2022 e expansion di nos turismo lo varia entre 12.4% (den un scenario pesimista), 30,4% (den un baseline scenario) y 40.1% (den un scenario optimista). Consecuentemente ta premira cu e cantidad di placa cu turistanan ta laga atras diariamente den nos economia lo crece den 2022. 

Pues generalmente pa aña 2022 ta premira un crecemento economico real di 2.1% (baseline) y den caso optimista por yega te hasta na 5.3%.

 

Sin duda cu gobierno di Aruba lo sigui stimula e crecemento economico di nos pais y ta spera di conta cu cooperacion di un y tur den nos comunidad.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: