PROMÉ MINISTER GILMAR PISAS SU PARTISIPASHON NA E DI TRES DIA DI E KONFERENSIA DI AICE 2022 NA JAMAICA
Willemstad – Promé Minister Gilmar Pisas tabata oradó prinsipal riba e di tres i último dia ku e tabata presente na e konferensia di AICE 2022, kual ta dia 15 di yüni 2022.
Dia 15 di yüni 2022 Promé Minister sr. Pisas lo hiba su di dos diskurso na e konferensia di AICE 2022. Esaki tabata durante di e seshon “Regional Ministers of Tourism Summit 2022”. Durante di e seshon aki a hiba diskurso tambe e Minister di Turísmo di Jamaica sr. Edmund Bartlett.
E seshon aki a trata entre otro:
- Uso di digitalisashon pa atraé e sektor di Turísmo: oportunidat pa hasi e parti di registrashon mas fásil i lihé;
- Mester bai over na produkshon di energia duradero, tantu pa e parti di transporte i tambe den Hotèl mirando ku turistanan ta mas konsiente;
- Hasi uso di Kultura i Historia mas tantu komo método pa atraé e sektor di Turismo. Hende lo bira mas importante ku djis e parti di solo i laman den futuro.
Dia 16 di yüni 2022 Promé Minister sr. Pisas a bai hasi un bishita na Jamagro Tech Farms Ltd na Kingston, Jamaica.
Sr. Pisas a risibí un tour huntu ku hopi informashon serka e fundadó i presidente di e Farm (Boerderij, Kunuku) aki kende ta sr. Gasan Azan i su tim.
E Farm aki ta konsistí di 400 hèktar di tereno, 25 hèktar di “greenhouses” i 50 hèktar di Hòfi. Tin e.o. “Greenhouses”, “Mesh houses”, “Hydroponic houses” i tambe e parti di kultivo.
E Farm aki ta kultivá un variedat amplio di produkto manera Salada, Kolo, Tomati, Siboyo largu, Boerenkool, Sèldu, Paksoi, Promentòn, Munt, Basilikum, Koriander i Petersèli. Huntu ku esakinan ta kultivá tambe Ackee, Pali Koko, Awakati, Papaya, Mango i Lamunchi.
Sr. Gassan a bisa ku nan tin hopi interes pa bini ku e sistema di Agrikutura aki na Kòrsou.
Promé Minister sr. Pisas a keda enkantá ku e proyekto i sistema di hasi Agrikultura aki i a bisa ku lo bai hasi “follow up” riba e bishita aki.