Site icon

Adikshon mester keda rekonosé komo un malesa!

Advertisements

Riba 26 di yüni 2022, Fundashon pa Maneho di Adikshon (FMA) ta kumpli 25 aña di eksistensia i frakshon di PAR pa medio di esaki ta felisitá FMA ku nan aniversario. Den kuadro di e selebrashon aki, FMA a organisá un kaminata i ku plaser Ana Maria Pauletta i Zita Jesus Leito a partisipá na esaki.

Fundashon pa Maneho di Adikshon durante añanan a bin ta informá, guia, duna terapia i kuida personanan ku un adikshon, nan famia i tambe komunidat kompleto.

E kaminda pa adikshon i tambe rekuperashon, ta diferente pa kada persona. Pa algun e por ta kòrtiku i pa otronan muchu mas largu. Personanan ku un adikshon por yega di konosé pèrdidanan grandi, debí na nan uso òf komportashon adiktivo i e impakto riba e famia ta grandi.

Ta importante pa kada un persona ku keda konfrontá ku adikshon risibí e yudansa nesesario. Den kuadro di esaki, frakshon di PAR lo hasi e kambionan nesesario den e lei di kuido médiko, pa rekonosé adikshon komo un malesa, manera esaki ta na diferente parti di mundu. Segun DSM4, e manual di diagnóstiko ku ta keda usa pa profeshonalnan médiko, ya pa algun aña kaba, ta rekonosé adikshon komo un malesa.

Rekonosé adikshon komo un trastorno di komportashon, esta un malesa, ta kita e stigma negativo ku tin riba esaki. Ta rekonosé e nesesidat di e persona pa buska yudansa. Meskos ku bo kibra un pia, bo mester di un dòkter. Di e mesun forma, si bo tin un adikshon, bo mester di un profeshonal pa bo kuido. Un siguiente efekto di e lei lo keda sinti den e ámbito laboral kaminda ta krea espasio pa e persona ku mester di kuido pa motibu di su adikshon, por buska esaki, sin ku e mester ta preokupá pa ku konsekuensianan na trabou.

E kambio aki ya kaba ta ankrá, komo punto di akshon pa e ministerio di GMN, den e dokumento ‘Visie Geestelijke Gezondheidzorg 2019”. I frakshon di PAR kier duna sosten na e vishon aki, for di e órgano legislativo Parlamento, konhuntamente ku Gobièrnu.

 

Exit mobile version