Minister Maduro di Finansa ta informa: Mike a corta sinta y awo Pueblo tin mas gasto di huur pa paga cu orguyo mescos cu e debe cu ela traha pa Aruba

 

 

 

 

 

Minister Maduro di Finansa ta informa:

Mike a corta sinta y awo Pueblo tin mas gasto di huur pa paga cu orguyo mescos cu e debe cu ela traha pa Aruba

 

Den e encuentro publico na Parlamento diahuebs ultimo, Parlamentario Eman a hiba palabra splicando cu Raad van Advies y CAFT a fada cu Gobierno, pasobra ta gastando mas placa na huur di edificio. Locual cu Mike Eman no ta splica ta cu ora e tabata na mando ela corta sinta pa habri edificionan di MFA y cu awo e cuenta a yega pa Pueblo paga cu orguyo mescos cu e debe cu Mike a traha pa Aruba.

 

MFA ta edificio caro

Den su discurso Parlamentario Eman a trece dilanti cu desde 2017 ora cu e Gabinete Wever-Croes a yega na mando, por mira cu gasto di huur ta subi grandemente. Cu e gastonan di huur a subi ta berdad, pero ora analisa esaki, por mira cu e subida ta debi cu awor aki e cuenta a yega pa paga pa edificionan caro di MFA na Noord, Santa Cruz, Paradera y Savaneta. Ora Mike Eman a corta sinta di e edificionan aki, e no a splica Pueblo cu nan a wordo traha cu e formula PPP y cu esaki ta pone cu nan ta bira edificio cu costo hopi mas halto di huur Pa Pueblo Paga. Edificio nan traha cu e formula di PPP ta forma 60% di gasto di huur di Gobierno, y den esaki e gastonan pa e edificionan di MFA tin un costo mas caro.

 

No ta edificio di Mama, Papa of Tanchi

Manera custumber, Parlamentario Eman ta busca manera pa manipula informacion y recuri na e politica cu gasto di huur a subi debi cu un Gobierno di MEP a bay huur edificio cerca Mama, Papa of Tanchi. Pero e cifra nan ta papia idioma masha cla, ta Mike Eman mes a percura pa pusha gasto halto di huur den cartera di Pueblo. Eman a corta sinta, core campania cu centro nan multifuncional pa Pueblo den bario, pero a lubida di splica Pueblo cu e gasto nan aki a yega awor Pa Pueblo Paga.

 

E huur mescos cu e debe ta pa Pueblo paga cu orguyo

Ta di lamenta cu Parlamentario Eman ta cuestiona subida di gasto di huur di Gobierno sin cu e ta tene cuenta cu e decisionnan cu e mes como ex Minister President di Aruba a tuma. Ta bisto cu mescos cu Mike a tuma decision pa redobla e debe di Aruba, ela hisa gasto nan di huur y a djies laga esaki atras pa Pueblo paga cu orguyo.