Premier Evelyn Wever – Croes: PROME MINISTER TA FELICITA MINISTER ARENDS RIBA SU MANEHO DI DESPERDICIO Entrante 22 di augustus no por hiba taira dump, reduciendo e posibilidad di candela riba dump

ORANJESTAD – Gabinete Wever – Croes I y II, semper a percura pa tin un maneho cu ta enfoca riba diferente aspecto relaciona cu cuido di medio ambiente. Den cuadro di esaki miho maneho di desperdicio y e situacion na dump Parkietenbos semper tabata (y ainda ta) un reto cual ta trahando duro riba dje pa soluciona. Recientemente Minister di Transporte, Integridad, Naturalesa y Asuntonan di Adultonan Mayor Ursell Arends a anuncia cu pronto no lo por hiba taira mas na dump. Esaki ta un hopi bon noticia considerando cu e lo reduci e posibilidad di candelanan riba dump. Prome Minister Evelyn Wever-Croes ta felicita Minister Arends pa cu e anuncio haci pa mehora maneho di desperdicio.

 

Den cuadro di e anuncio aki, Minister Arends a anuncia algun informacion importante pa comunidad tene cuenta cu ne. 

Entrante 22 di augustus 2022 ta cuminsa ehecuta e plan di re-direccion di desperdicio.  E prome tipo di desperdicio lo ta taira. Motibonan pa e escogencia aki tin di haber cu e hecho cu (1) e coleccion di taira ya caba ta basta organisa den sector comercial, y (2) e necesidad urgente di sigura cu ningun candela tuma luga mas riba e tereno di Parkietenbos. 

Resultado di e forum di Trash 2 Cash a identifica dos compania cu por procesa taira den forma efectivo actualmente. E companianan aki ta: Ecotech y Carentra. 

Mester tuma bon nota cu desde 22 di augustus 2022 en adelante, tur desperdicio di taira lo mester wordo deposita na un di e dos localidad nan aki. 

 

Realidad ta cu un acercamento holistico ta necesario pa por yega na un solucion definitivo pa e situacion di dump. Den cuadro di esaki ta gradici Minister Ursell Arends cu ya pa algun tempo ta ehecutando su vision y maneho pa atende cu e problema di desperdicio. Danki na e trabou duro haci, awe Aruba ta un paso mas cerca di logra e meta pa tin un miho maneho di despercio y tambe cera dump Parkietenbos. 

 

Por ultimo Prome Minister Wever – Croes a enfatisa cu e ta tuma esfuerso di henter comunidad pa por ehecuta e plannan aki na bienesar di nos medio ambiente, salud y bida marino. Un bes mas, ta felicita Minister Arends y tur departamentonan y instancianan envolvi cu a haci esaki posibel.  

This site uses Akismet to reduce spam. Learn how your comment data is processed.

%d bloggers like this: