Prome Minister Evelyn Wever-Croes: Prome Minister den Discurso Nacional: Awo cu acuerdo cu Lotto a wordo cambia MAS PLACA TA KEDA ARUBA PA INVERTI DEN DEPORTE
“Cu e logro aki, Lotto pa Deporte ta sali gana. Nos hobennan deportista ta sali gana. Aruba ta sali gana”
Prome Minister Evelyn Wever-Croes, despues cu Aruba a pasa den temponan hopi dificil, durante su discurso dirigi na pueblo di Aruba diadomingo ultimo, a anuncia noticianan y desaroyonan positivo cu ultimo dianan a pasa pa nos pueblo.
Un desaroyo hopi positivo den e ultimo dianan aki, ta e anuncio cu a logra cambia e acuerdo relaciona cu e entradanan di e loterianan di Lotto pa Deporte. Di tur e ganashi di e loterianan di Lotto pa Deporte antes 8.25% tabata bay Canada. Pero desde 2011, e areglo a wordo cambia y 23.5% ta bay Canada, y e resto tabata keda Aruba.
Asina den e añanan 2011 pa 2020 ,104 miyon a bay Canada y 34 miyon so a bay den deporte na Aruba. Lamentablemente, esaki a stroba hopi mucha y hoben deportista pa bay den exterior pa competi, of mester bende rifa den solo pa logra cera e cen pa nan competi den exterior. E acuerdo awor lo wordo cambia den net contrario, 8.25% ta bay Canada y e resto ta keda Aruba pa wordo inverti den deporte na Aruba y den deportistanan di Aruba. Esaki ta un gran logro pa Lotto pa Deporte, pa nos hobennan deportista y un gran logro pa Aruba en general.
E logro aki, mester wordo considera uno importante, impactante y historico. Esaki ta muestra cu ora cu di berdad ta traha duro cu dedicacion y determinacion, ta logra cosnan grandi. Desde inicio di Gabinete Wever-Croes I na 2017, a encontra retonan riba e tereno di deporte. Minister di Deporte e tempo ey, Dangui Oduber, a lucha hopi duro pa duna deporte e luga cu e merece mientras cu a pasa den hopi reto den temponan no facil. Pero pa Minister Oduber, deporte tawata tin un prioridad hopi halto.
Despues den gobernacion di Gabinete Wever-Croes II, Minister Endy Croes tawata tin e mesun Deseo aki pa Aruba. Cu Disciplina el a sigui traha riba e proyecto pa rescata Lotto bek. E no a laga nada stroba su Dedicacion pa logra. Y cu e Determinacion di tur dia, Minister Endy Croes a logra. Cu e logro aki, Lotto pa Deporte ta sali gana. Nos hobennan deportista ta sali gana. Aruba ta sali gana. Pabien Aruba.
“Cada hoben deportista ta un hoben menos riba caya. Cada hoben deportista ta un hoben cu ta bay haci cosnan grandi pa su pais”, Prome Minister e enfatisa.
