Minister Dangui Oduber Den e prome 6 luna Aruba a recupera 92% di su turismo compara cu aña 2019

 

ORANJESTAD – Dialuna durante conferencia di prensa di gobierno Minister di Turismo y Salud Publico sr. Dangui Oduber a hiba palabra. E mandatario a trece dilanti algun cifranan pa locual ta trata e prome 6 lunanan di Aruba su turismo. A papia di entre otro e cantidad di bishitante ricibi, e prestacionnan na hotels y e recuperacion den general.

Minister Oduber ta sumamente satisfecho di con Aruba su turismo ta desroyando bisando cu Aruba su turismo a conoce un recuperacion di 92% den comparacion cu aña 2019. Segun Minister Oduber si no ta pa e luna di januari cu Aruba a sinti e efectonan di e variante di Omicron ya caba Aruba lo a yega e nivelnan di aña 2019 cu tabata un aña record pa Aruba su turismo. Aruba ta conociendo un recuperacion excepcional y entre e mihornan di henter mundo. E cifra averahe di recuperacion mundial ta 46% y e cifra averahe di recuperacion den nos parti di mundo ta 60%.

Den e ultimo 3 raportahe mensual di ATA a keda demostra cu Aruba durante e ultimo 3 luna consecutivo (april 108%, mei 103%, juni 103%), Aruba su recuperacion ta surpasando esun di aña 2019. E raportahe di e cifranan di luna di juli ainda no ta conoci pero ta premira cu esaki tambe lo surpasa e cifranan di juli di 2019.  Segun IMF Aruba ta e di 2 pais na mundo cu e mihor recuperacion di su turismo. 

Minister Oduber ta hiba un maneho unda tin un bon cooperacion cu tur e partnernan den e sector turistico. Minister Oduber ta gradici tur e partnernan, tur cu ta traha den e industria turistico y tur esnan cu ta haciciendo esaki posibel y sin laga afor Ministerio di Turismo.

Minister Dangui Oduber ta bay sigui enfoca riba e cresemento di Aruba su turismo den cuadro di e aña di recuperacion pa asina mantene e trend aki.

This site uses Akismet to reduce spam. Learn how your comment data is processed.

%d bloggers like this: