Den reunion cu Sindicatonan awe mainta Minister Glenbert Croes un biaha mas ta pone WEB, ELMAR y Utilities na mesa

Diamars mainta Minister Glenbert a reuni cu Sindicatonan hunto cu WEB, ELMAR y Utilities riba e ahuste recien di prijs di awa y coriente.

 

Manera nos tur por corda, 30 di juni ultimo unilateralmente WEB a anuncia aumento di tarifa di awa, cual ahuste lo a keda introduci 1 di juli ultimo. E anuncio aki a wordo rechasa categoricamente pa Gobierno di Aruba unda cu e mandatario encarga cu Energia a duna su instruccion pa pospone e introduccion aki. E instruccion a splica tambe cu e punto di salida mester ta un tarifa mas socialisa cu reparticion husto.

 

Conhuntamente cu Minister di Economia, Geoffrey Wever, a yega na un structura nobo di tarifa pa WEB y pa ELMAR cual a wordo aproba pa Conseho di Minister. E reparticion aproba tabata social, pa esunnan di menos recurso wordo menos afecta pa e ahuste aki. Na mes momento Gobierno a dicidi cu e prijsnan nobo lo wordo reevalua dentro di 6 luna atrobe.

 

Sindicatonan a expresa nan preocupacion. Awe mainta encabesa pa Minister Glenbert Croes a sinta cu sindicatonan hunto cu director di WEB, ELMAR y Utilities. E mandatario a considera e reunion hopi constructivo, fructifero y franco. E discusionnan tabata hopi abierto y franco. Di parti di Sindicatonan a haci un apelacion na WEB pa reevalua e structura nobo di tarifa pa hacie mas social ainda. E mandatario a apoya e peticion aki. WEB di su banda tambe tabata habri pa bay haci e ehercicio interno pa reevalua un structura aun mas social unda cu esunnan di menos recurso ta wordo menos afecta, miho beneficia.

 

Manera Minister Glenbert Croes a expresa, ningun Gobierno kier aumenta ni awa ni coriente ni gasolin. Pero e guera di Rusia/Ukraina a gara mundo di sorpresa cu a ocasiona un aumento drastico na nivel mundial di prijs di petroleo. Y apesar cu desde januari ultimo WEB y ELMAR tabata pidi pa aumenta e tarifanan, e mandatario no a permiti esaki, pasobra mescos cu e pandemia a afecta e companianan aki, el a afecta nos pueblo severamente. Apenas Aruba a drenta aña di recuperacion pa cual e mandatario kier a brinda nos pueblo e espacio pa recupera y para bek riba pia. Pero ora cu na luna di februari e guera entre Rusia y Ukrania a cuminsa, esaki a afecta solvencia di nos companianan estatal barbaremente. Asina mes e mandatario a keda pospone e aumento. Pero ta yega un momento cu como Gobernante bo mester ta responsabel den bo maneho cual ta conta pa nos pueblo primordialmente, pero tambe pa existencia di nos companianan estatal.

 

Importante ta cu a logra pone WEB, ELMAR y Utilities bek na mesa pa aki dos siman bin cu un reevaluacion cu un proposicion ahusta.