Prome Minister Evelyn Wever-Croes: DESDE HULANDA PROME MINISTER TA DEDICA NA DIFERENTE TRABOU Y REUNION

Prome Minister Evelyn Wever-Croes desde siman pasa a tuma vacacion despues di basta tempo di trabounan intenso. Sinembargo, durante su vacacion, Prome Minister a tuma tempo pa dedica na diferente trabou y reunion entre otro pa e situacion financiero di nos pais.

 

Desde Hulanda, e ta trahando hunto cu esnan concerni riba e nota di maneho financiero nobo, cu ta stipula e trayecto con Aruba lo sali di e debenan ocasiona pa e pandemia mundial. E nota di maneho aki lo yama Financieel Economisch Memorandum # 2. E consehonan di IMF lo forma un base pa esaki asisti door di un entidad Hulandes.

 

Ademas di esaki, Prome Minister a reuni tambe cu Secretario di Estado Alexandra van Huffelen y sr. Gradus di CAft pa traha riba e esfuersonan pa evita un aanwijzing. “Nos ta haciendo locual ta nos alcance pa trece e trankilidad cu tin mester pa Aruba y pa no frena e progreso cu Aruba ta aden”. Prome Minsiter a duna di conoce cu e siman nos dilanti e lo sigui cu e deliberacionnan na Hulanda. “Nos Gobierno ta tuma e retonan financiero hopi na serio, y si mester sacrifica vacacion pa atende cu e retonan aki, mi ta haci’e”.

 

Prome Minister a atende diferente reunion na Arubahuis den cuadro di Landspakket y situacion financiero di nos pais. A reuni cu Directora Interim di Arubahuis sra. Glenda Hernandez y Minister Plenipotenciario Interino sr. Ady Thijsen tocante desaroyo di Arubahuis awor den un oficina temporal nobo. Arubahuis ta representacion di Aruba na Hulanda y den Europa. Y den esaki ta hunga un papel importante pa nos pais

 

Prome Minister a reuni tambe cu e ekipo completo di Arubahuis expresando su gradicimento y satisfaccion di Gobierno di Aruba pa tur e trabounan cu Arubahuis a eherce durante añanan. Durante e reunionnan aki a delibera hopi largo riba e percepcion, speransa y kico ta locual comunidad di Aruba ta spera di Arubahuis.

Tambe Prome Minister a ricibi na Schiphol e grupo di studiante cu a yega Hulanda pa continua nan estudio. Prome Minsiter ta gradici e opvangcommissies cu ta hopi entusiasma pa yuda nos studiantenan na Hulanda.

 

“Mi ta hopi contento y satisfecho con tur e reunionnan a bay aki na Hulanda y ta hopi contento tambe di e palabracionnan cu a wordo haci e dianan aki. Aunke cu e motibo di mi biahe ta vacacion riba gastonan propio, pero trabou ta keda exigi atencion y mi ta contento di por cumpli cu mi trabou unda cu mi por ta. Na e momentonan aki, Aruba mester di nos tur pa hiba nos pais padilanti”, Prome Minister Evelyn Wever-Croes a expresa.

 

This site uses Akismet to reduce spam. Learn how your comment data is processed.

%d bloggers like this: