Lo bai aktua kontra di stashonamentu riba asera

 

KOMUNIKADO DI PRENSA 387 / 2022
16 ougùstùs 2022
Lo bai aktua kontra di stashonamentu riba asera
Departamentu di Komunikashon i Prevenshon
KUERPO POLISIAL KÒRSOU SIRBI I PROTEHÁ

Caracasbaai
Den dianan benidero, polis lo bai aktua di forma severo kontra di outomobilistanan
ku ta stashoná vehíkulo di un forma íresponsabel riba asera tantu den area di
Caracasbaai komo di Janthiel.
A bira kustumber ku sigur den fin di siman i pa ta mas eksakto riba djadumingu, ku
doñonan di seadoo ta pone nan vehíkulonan i e trailer for di oranan trempan di
mainta riba asera i ta bai laga esaki patras, te den oranan lat di atardi òf anochi ku
nan regresá.
Konsekuentemente personanan ku ta kana den e área ei na pia, hopi bia mester
kana riba kaya na unda outo ta kore, eksponiendo nan mes na tur klase di peliger.
Tin bia e vehíkulonan aki ku e trailernan pegá na nan, ta wòrdu bentá di tal manera
riba asera, ku apenas dos outo por pasa pareu banda di otro.
No ta bai tolerá mas ku ta pone trailernan riba asera na Caracasbaai. Polis ta bai
aktua i ta pidi tur doño di seadoo, pa tuma otro medida pa ku stashonamentu di nan
vehíkulonan i trailernan, sin ku esaki ta opstakulisá tráfiko of hinka esaki den peliger.
Janthiel
Tambe lo bai aktua na Janthiel den e área di e playa, ya ku einan tambe a bira
kustumber ku vehíkulonan ta wòrdu stashoná di un manera íresponsabel riba asera.
Aparte ku esaki ta forma un peliger pa hendenan na pia, e ta stroba tráfiko motorisá
i ta hasi difísil pa bùsnan grandi (konvoi) kue e bògtnan ku fasilidat.
Tur kaminda ku e rant di asera ta pintá na koló hel i pretu, ta prohibí pa stashoná
vehíkulo.
Den e kaso aki tambe polis lo tuma medida pa ku e outomobilistanan i nan
vehíkulonan.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: