STAMPIA SPESHAL PA SELEBRÁ 25 AÑA WILLEMSTAD KOMO PATRIMONIO MUNDIAL

Willemstad – Riba djaweps 18 di ougùstùs CPOST International a hasi entrega ofisial di e promé buki di stampianan, kreá speshal pa selebra Willemstad komo Patrimonio Mundial, na Minister Charles Cooper komo e Minister enkargá ku nos Patrimonio.

E buki di stampia ta kontené diferente modelo úniko di stampia desiña pa nos profeshonal Eugenique Wilkins, ku alabes ta un kolaboradó ku ta laborá na Servisio pa Planifikashon Urbano. Kada stampia tin su nòmber i su inspirashon original.

Na e okashon di entrega, invitadonan a hasi un kaminata den nos Sentro di Suidat pa por tuma nota di e diferente sitionan ku a inspirá e diseñado pa krea e diseño di stampianan.

Tambe, Despues ku Minister Charles Cooper a risibí e promé buki, e na su turno a entrega un eksemplar na Minister van Heydoorn komo e Minister enkargá ku Enseñansa, pa asina e por yuda introdusí nos Patrimonio Mundial den nos skolnan.

Tambe Minister Cooper a hasi entrega di un pakete na Minister Ruisandro Cijntje, pa Minister Cijntje di su banda, yuda promové esaki komo un produkto turístiko, estilo ‘collectors item’.

Diferente tabata e invitadonan na e okashon aki den e área di Fluer de Marie, ku a eksperensiá e bunita okashon aki. Entre nan tambe Minister di Salubridat, Sra. Janga, Stichting Monumentenfonds, Stichting Monumentenzorg, i mas.

Pueblo di Kòrsou tambe por kumpra e bunita buki di stampia aki na CPOST International pa asina keda ku esaki komo rekuerdo di nos Willemstad su 25 aña riba lista di Patrimonio Mundial di UNESCO.

E aktividat aki a keda organisá den estrecho koperashon entre VVRP, ROP, i CPOST.