E zèp di KLM ta un ‘wake-up call’ mas. Ku fondonan di garantia por krese otro sektornan sam sam ku turismo.

E zèp di KLM ta un ‘wake-up call’ mas.

Ku fondonan di garantia por krese otro sektornan sam sam ku turismo.

 

 

Willemstad — Segun Partido PIN e pániko ku a surgi tokante ménos stul riba e ruta pa Kòrsou ta mustra e vulnerabilidat di un ekonomia ku ta stèns riba solamente un sektor pa su kresementu. Por yora, por zundra, pero loke mester hasi na promé lugá ta hisa spit pa konkretisá áreanan di kresementu alternativo di nos mes, manera e-gaming i agrikultura moderno. Ademas ainda no ta lat pa habri porta p’e industria di kanabis medisinal.

Pensando mas leu, buskando kontesta riba e pregunta foi unda invershonistanan lo saka plaka pa drenta den e sektornan nobo ei, Partido PIN ta puntra:

den kasi un aña di tempu kiko gobièrnu Pisas a hasi ku e intenshon di kabinete Rutte IV pa pone fondonan Hulandes pa garantia di invershon disponibel pa Kòrsou tambe?

 

Garantia i stabilidat

E aktual koalishon Hulandes a anunsiá su intenshon pa hasi Hulanda su fondonan di garantia aksesibel pa garantsá invershon di invershonista lokal tambe. P’esei den un komunikado foi 15 di desèmber 2021, Partido PIN a sugerí pa e ministernan relevante den gabinete Pisas mesora bini huntu ku otro aktornan di interes pa forma un struktura di guia pa por yega na e fondonan aki. Un paso asina ta importante pasó garantia, sigur si ta trata un sektor ekonómiko nobo, ta hasi un invershon imposibel bira posibel. Resultado lo ta kresementu ekonómiko mas lihé i balansá.

P’esei, despues di kasi un aña Partido PIN i komunidat ta puntra: kiko gobièrnu Pisas i e koalishon aktual a hasi ku e intenshon Hulandes pa habri su fondonan di garantia pa invershon i invershonista lokal? Premier Pisas a kòrda sr Rutte riba esaki? Parlamentarionan a pone esaki riba agènda di IPKO? Si no a hasi nada, un hende den fòrti por indiká e motibu i tambe bisa si tin intenshon di bai hasi algu ainda? Si e kontesta ta si, pa ki dia? Si ta no, dikon no?

Pa PIN i nos sektor produktivo ta importante i ta oportuno pa e preguntanan aki haña kontesta. Importante paso mester aselerá nos ekspanshon ekónomiko. Oportuno paso e sosten mionario resien foi Hulanda pa Damen i CDM Holding, inisiá pa èks-minister Martina i eksitosamente finalisá pa minister Cijntje, ta indikashon ku tin disponibilidat den Reino pa sostené aktividat ekonómiko bon pensá.

 

Mas direkshon

Despues dje anunsio traishonero di KLM, Partido PIN a nota ku porfin diferente parlamentario di koalishon mes, ku sr. Doran komo un di nan, meskos ku PIN a hasi semper, awor a kuminsá pidi pa yora ménos i konkretisá e kosnan ku nos mes por.

Loke falta ta pa miembronan di koalishon asumí nan responsabilidat i yama entre otro minister di finansas pa bin splika den parlamento kuantu falta pa kaba revisá e leinan di e-gaming, minister di salubridat pa puntr’e si a pone sèn den e fondo agrario, ministernan di salubridat i ekonomia pa sa si porfin a firma e dekreto di awa mas barata pa agrikultornan, minister di VVRP pa sa si a fasilitá tereno p’e agrikultornan di generashon nobo i kon ta pará ku realisá kategoria 1 pa aviashon,  hinter kabinete pa kada minister splika kon e ta korta red tape den su kartera, anto minister di salubridat atrobe p’e splika dikon no ta debatí riba e lei di kanabis medisinal pa kaba.

Share this page to Telegram

This site uses Akismet to reduce spam. Learn how your comment data is processed.

%d bloggers like this: