KÒRSOU TA LOGRA DI HAÑA 18.6 MIYON EURO DI UNION EUROPEO PA MANEHO SOSTENIBÈL DI AWA I SANIDAT

KÒRSOU TA LOGRA DI HAÑA 18.6 MIYON EURO DI UNION EUROPEO

PA MANEHO SOSTENIBÈL DI AWA I SANIDAT

 

Willemstad – Djamars dia 22 di novèmber 2022 tabata e klousura di e di 19 Foro Anual di Paísnan di Ultramar i Union Europeo organisá pa Komishon Europeo.

E foro a tuma lugá di 17 pa 22 di novèmber 2022 na Nouméa, Nieuw-Caledonië.

 

Riba e último dia, 22 di novèmber 2022, a tuma lugá den presensiá di Embahador Ard van der Vorst, akreditá na Nueva Zeelandia i representando Sekretario di Estado pa Asuntunan di Reino, Sra. Alexandra van Huffelen, un enkuentro entre Kòrsou i e 5 otro LGOnan Ulandés ku Sra. Jutta Urpilainen, Eurokomisario pa Relashon Internashonal.

 

Despues mas lat mainta Ministro Plenipotensiario, Sr. Carlson Manuel, a dirigí su mes na e konferensia. Den su intervenshon Sr. Manuel entre otro a gradisí na nòmber di Promé Minister sr. Pisas e Gobièrnu di Nieuw-Caledonië pa su hospitalidat i tambe Union Europeo pa tur e sostén ku Kòrsou a risibí durante di e añanan ku ta tras di lomba.

Tambe a bai palabranan di gradisimentu na e delegashon di Union Europeo na Georgetown, Guyana, pa e yudansa ku a bini ta ofresé na Kòrsou den e trayekto di programashon di e sènnan di desaroyo ku Kòrsou ta risibí di Union Europeo.

 

Na final di e foro aki nos por resumí ku e delegashon di Kòrsou, bou di liderazgo di Minister Plenipotensiario Sr. Carlson Manuel, a risibí di parti di e Eurokomisario di Relashon Internashonal, Sra. Jutta Urpilainen, e grato notisia ku pa e periodo di 2021 – 2027 Kòrsou lo risibí un montante di 18.6 miyon Euro pa e programa territorial di mas aña di nos país.

E plaka akí ta destiná pa ser invertí den sektor di “Water Management & Sanitation” ku ta enserá traha instalashon di purifikashon di awa nobo i renobashon di e instalashonnan eksistente.

 

Tambe nos Kòrsou a logra di haña e posishon di “Regional Authorizing Officer” (RAO) pa e periodo te ku 2027.

Promé Minister sr. Gilmar Pisas, lo ehersé e funkshon di RAO.

Durante di e Konferensia Ministerial di OCTA, kual a tuma lugá riba djaluna 21 di novèmber 2022, unánimamente Kòrsou a ser elehí komo e Presidente nobo di e Komité Ehekutivo di OCTA.

E funkshon aki lo ser ehersé pa sra. drs. Ann Groot-Philipps di Kas di Kòrsou.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: