ACOYA Curaҫao Resort, Villas and Spa ta anunsiá Tim di Maneho nobo

WILLEMSTAD:- ACOYA Curaҫao Resort, Villas and Spa a konosé un kresementu stabil i konsistente durante di e ultimo añanan. Interes di bishitantenan for di islanan ABC i den region ta haltu i e resort ta sigui lanta kuriosidat serka bishitantenan internashonal.

ACOYA ta mira padilanti riba un trayekto nobo i prometedor ku un tim di maneho nobo. E tim nobo ta konsistí di profeshonalnan bon ekipá i eksperensiá den e sektor. Sr. Henry Martijn ku pa años ta e kara di ACOYA i a bin ta hasi un tremendo trabou den promoshon di e hotèl a keda asigná ku e título di Chief Operating Officer (COO) i lo forma parti di e tim di maneho nobo, huntu ku sra, Meena Hemnani (Finance/HR Manager) i sra. Yuritee Herman (Frontoffice/Reservations Manager). Pa reforsá e tim di benta i merkadeo ta añadí otro profeshonal di hopi eksperensia den industria turístiko i di hotèl tantu lokal i internashonal, den persona di sra. Karen Felida-Evans, komo Sales and Marketing Executive.

Di akuerdo ku sr. Martijn, awor mas ku nunka su kompromiso ta pa sigui desaroyá  ACOYA Curacao Resort Villas & Spa komo un marka prominente den industria turístiko lokal i internashonal. Sr. Martijn tin un konosementu amplio di e industria hotelero lokal i su pashon pa akomodá huéspetnan i laga nan eksperensia ACOYA i Kòrsou komo destinashon ta di atmirá. Huntu ku su koleganan i e tim di maneho, e lo sigurá e kontinuashon di un servisio di kalidat haltu, i lo pèrkurá pa sigui duna entrenamentu na aspirantenan den industria.