Prome Minister Evelyn Wever-Croes 𝗖𝗒𝗛𝗒, π—₯𝗔𝗙𝗧 𝗬 π——π—˜π— π—’π—–π—₯π—”π—§π—œπ—¦π—–π—› π——π—˜π—™π—œπ—–π—œπ—§ 𝗧𝗔 π—”π—Ÿπ—šπ—¨π—‘ π——π—œ π—˜ π—§π—˜π— π—”π—‘π—”π—‘ 𝗖𝗨 π—Ÿπ—’ 𝗧π—₯𝗔𝗧𝗔 𝗗𝗨π—₯π—”π—‘π—§π—˜ π—₯π—˜π—¨π—‘π—œπ—’π—‘ 𝗑𝗔 π—¦π—œπ—‘π—§ 𝗠𝗔𝗔π—₯π—§π—˜π—‘

ORANJESTAD – E siman aki ta tuma luga na Sint maarten un reunion entre Prome Ministernan di Aruba Corsou y Sint Maarten y Secretario di Estado Alexandra van Huffelen. Durante di e encuentro lo trata diferente punto riba agenda entre otro Coho, Raft, e debenan cu tin cu Hulanda y pago di e debenan of kwijtschelding di e debenan, e tema di β€˜democratisch deficit’ cu Hulanda a pone riba agenda. E tipo di e reunionan aki ta hopi importante y Aruba lo wordo representa eynan a traves di Prome Minister y algun consehero cu lo yuda den diferente area.
Aruba, Corsou y Sint Maarten ta paisnan cu hopi similaridad pero alabes cu cierto diferencia. Pero ora cu uni y traha hunto, por logra cosnan grandi pa cada pais. Aruba, Corsou y Sint Maarten a uni y traha riba un alternativa pa Coho cual Hulanda lo trece su punto di bista riba dje. Premier Evelyn Wever-Croes ta enfatisa cu Aruba ta comprometi na haci reformanan y cambionan cu mester haci. E tema aki lo wordo trata e siman aki den e reunionnan na Sint Maarten.
β€œDemocratisch defecit ta un tema cu Hulanda a pone riba agenda, cual ta importante pa papia di dje. Specialmente durante di pandemia a ripara cu no tin democracia real den Reino, y hopi condicion a wordo pone riba nos y ta bon pa haci palabracion pa futuro riba esakinan,’ Prome Minister Wever – Croes a duna di conoce.
Pa Aruba e geschillenregeling ta hopi importante, mirando cu e ta un areglo pa ora cu tin disputa entre Hulanda y Aruba, tin un proceso pa por apela e decisionnan y ki caminda tin cu cana. Pa motibo cu aworaki no tin esey, hopi biaha mester acepta e condicionnan sin mas. Esaki ta un tema cu Parlamento di Aruba tambe tin hopi interes pa traha riba dje y a uni hunto cu Parlamentonan di Corsou y Sint Maarten cu e meta pa logra e union aki riba nivel di Gobierno tambe.
Terminando Prome Minister Wever – Croes a expresa cu aΓ±a 2023 lo ta un aΓ±a hopi positivo pa Aruba riba nivel economico, turistico y finansas y lo sigui traha duro pa combati tur problema social y probresa cu tin ainda den comunidad. 2023 ta un aΓ±a positivo y gobierno tin e actitud positivo pa enfrenta tur e retonan ey. β€˜Den union y cu positivismo aworaki den Reino lo purba logra cosnan grandi. β€˜
Share this page to Telegram

This site uses Akismet to reduce spam. Learn how your comment data is processed.

%d bloggers like this: