𝗣π—₯π—˜π—£π—”π—₯π—”π—–π—œπ—’π—‘ 𝗔𝗑𝗗𝗔𝗑𝗗𝗒 𝗣𝗔 π—•π—œπ—¦π—›π—œπ—§π—” π——π—œ π—₯π—˜π—¬ π—ͺπ—œπ—Ÿπ—Ÿπ—˜π—  π—”π—Ÿπ—˜π—«π—”π—‘π——π—˜π—₯, π—₯π—˜π—œπ—‘π—” π— π—”π—«π—œπ— π—” 𝗬 𝗣π—₯π—œπ—‘π—¦π—˜π—¦ π—”π— π—”π—Ÿπ—œπ—” π—˜ π—Ÿπ—¨π—‘π—” π—”π—žπ—œ

ORANJESTAD – Actualmente Conseho di Minister ta bezig cu preparacionnan pa bishita di Rey Willem Alexander, Reina Maxima y nan yiu Prinses Amalia. E ultimo biaha cu e famia real a bishita Aruba tabata 8 aΓ±a pasa, sin nan yiu muhe Prinses Amalia, pues esaki lo ta su prome biaha na Aruba. Gobierno di Aruba ta ansioso pa ricibi e bishita y ta haciendo tur e preparacionnan pa asina e famia real por haya un caluroso bon bini.
Prome Minister Evelyn Wever – Croes a splica cu Rey Willem Alexander hunto cu su famia lo reuni cu Gobernador di Aruba, Parlamento di Aruba y Gobierno, pero banda di esaki lo tin amplio oportunidad pa comunidad tambe saluda Rey Willem Alexander, Reina Maxima y Prinses Amalia. E actividadnan lo tuma luga na playa y na San Nicolas, pues lo tin suficiente momento pa tur hende saluda e famia real y pa mayornan presenta e yiunan na e Rey, Reina y Prinses di Reino Hulandes.
Desde cu e bishita a wordo anuncia a tuma nota di hopi interes y entusiasmo den comunidad pa cual di parti gobierno ta desea cu scolnan tambe prepara pa e bishita y cu comercio decora nan establecimentonan pa duna Rey Willem Alexander, Reina Maxima y Prinses Amalia e caluroso bon bini na Aruba.
Por ultimo, Premier Wever – Croes a bisa cu e programa y tur detaye manera fecha, orario y sitio di e bishitanan ainda ta den preparacion, pero desde awo henter comunidad ta invita pa asisti na esaki.
Share this page to Telegram

This site uses Akismet to reduce spam. Learn how your comment data is processed.

%d bloggers like this: