𝘌𝘯𝘤𝘰𝘯𝘦𝘹𝘪𝘰𝘯 𝘤𝘶 𝘋𝘪𝘢 𝘥𝘪 𝘉𝘦𝘵𝘪𝘤𝘰 2023: 𝗠𝗜𝗡𝗜𝗦𝗧𝗘𝗥 𝗫𝗜𝗢𝗠𝗔𝗥𝗔 𝗠𝗔𝗗𝗨𝗥𝗢 𝗔 𝗕𝗜𝗦𝗛𝗜𝗧𝗔 𝗔𝗚𝗡𝗘𝗦 𝗞𝗟𝗘𝗨𝗧𝗘𝗥𝗦𝗛𝗢𝗢𝗟

Diabierna mainta Minister di Cultura a bishita Agnes Kleuterschool, esaki den cuadro di Celebracion di Dia di Betico 2023. E mandatario a splica e alumnonan e motibo di e celebracion y tambe a invitanan pa hunto cu nan mayornan bishita e actividadnan relaciona cu Dia di Betico riba Plaza Libertador Betico Croes y esnan organisa den barionan dia 25 di januari proximo. Minister Maduro a entrega scol un pintura di Betico, un linial di recuerdo di Betico y un foyeto cu informacion pa cada alumno.

𝘐𝘯𝘷𝘪𝘵𝘢𝘤𝘪𝘰𝘯 𝘯𝘢 𝘮𝘶𝘤𝘩𝘢𝘯𝘢𝘯 𝘺 𝘧𝘢𝘮𝘪𝘢 𝘱𝘢 𝘱𝘢𝘳𝘵𝘪𝘤𝘪𝘱𝘢 𝘥𝘦𝘯 𝘒𝘪𝘣𝘳𝘢 𝘊𝘰𝘤𝘰 𝘳𝘪𝘣𝘢 𝘊𝘢𝘺𝘢

Ademas ta invita famianan pa participa den e actividad Kibra Coco Riba Caya, cual lo ta den un forma di Car rally/ Scavenger hunt. Esaki lo tuma luga diadomingo 22 di januari iniciando pa 10 or di mainta. Tur esnan cu ta participa ta ser spera na e parkeo di Urataka Center y aki lo ricibi tur instruccion pa participa. Ban cana den pasonan di Betico, caminda lo bishita sitionan historico den e bida di nos Libertador Betico Croes. Diadomingo for di 10 or di mainta e programa special ta cuminsa, grupo mester ta maximo 5 persona 2 adulto y 3 mucha, inscripcion di e grupo ta tuma luga na momento cu scan e prome barcode na e prome pista.

Minister Xiomara Maduro a gradici e staf di docentenan cu a dune e oportunidad pa bishita Agnes Kleuterschool y tambe a gradici e alumnonan pa e bunita recepcion y a expresa na cada un Felis Dia di Betico.