𝘔𝘪𝘯𝘪𝘴𝘵𝘦𝘳 𝘋𝘢𝘯𝘨𝘶𝘪 𝘖𝘥𝘶𝘣𝘦𝘳 𝗦𝗘𝗚𝗨𝗡 𝗣𝗟𝗔𝗡𝗡𝗜𝗡𝗚 𝗣𝗥𝗢𝗬𝗘𝗖𝗧𝗢 𝗕𝗔𝗕𝗬 𝗕𝗘𝗔𝗖𝗛 𝗙𝗔𝗦𝗘 𝟮 𝗧𝗔 𝗞𝗘𝗗𝗔 𝗘𝗡𝗧𝗥𝗘𝗚𝗔 𝗗𝗘𝗡 𝗟𝗨𝗡𝗔 𝗗𝗜 𝗔𝗣𝗥𝗜𝗟

ORANJESTAD – Diahuebs mainta Minister di Turismo y Salud Publico sr. Dangui Oduber a tene un conferencia di prensa na Baby Beach. Aki e mandatario a informa comunidad di e desaroyonan cu tin pa cu fase 2 di e proyecto di Baby Beach, specialmente e area di parkeo nobo. Henter e proyecto aki ta foma parti di e MasterPlan cu tin pa e area di Seroe Colorado. Minister Oduber a mustra riba e hecho cu turistanan ta paga hopi placa pa bin Aruba, pesey ta importante pa keda haci inversion den nos producto Aruba. E proyecto di Baby Beach Fase 2 ta acapara un area di 6000 m2.
E mandatario a duna di conoce cu si tur cos sigui segun plan e fase 2 di e proyecto lo wordo entrega pa e contratista CVC den luna di april. Despues di esaki lo continua cu fase 3 di e proyecto y pa fin di e aña aki e proyecto di Baby Beach lo mester keda cla completo. Na momento cu esaki termina lo bay cuminsa mesora cu e proyecto di Rodgers Beach caminda mescos cu e proyecto di Baby Beach lo bay construi area di parkeo, pone iluminacion, bin cu kioskonan etc. Minister Oduber a señala cu e proyecto di Rodgers Beach lo bay wordo financia cu fondonan di Tourism Product Enhancement Fund (TPEF) di cual ya caba tin e fondonan aloca.
Tur e proyectonan aki ta bay percura pa eleva henter e area rond di e playanan aki teniendo na cuenta e importancia di conserva nos naturalesa, creando asina un desaroyo di embeyesimento di e area na un manera sostenibel.
Den fase 2 di e proyecto di Baby Beach cu ta den pleno ehecucion ta construiendo un area di parkeo completamente nobo, pone iluminacion nobo y construi un retonde nobo, cual tambe ta parti di e plan aki. Ta bay tin bañonan publico pa tur bishitante, lo pone tambe dos kiosko caminda hende por bay cumpra cuminda y/of bebida. E meta ta pa e kiosko nan aki refleha e cultura Arubano y bende cuminda nan cu ta tipico den e area di Caribe.
Pronto den e lunanan nos dilanti gobierno lo cuminsa cu e destaho publico pa asina cuminsa cu Fase 3 di e proyecto di Baby Beach. Den e fase aki lo renoba e 2 tennis court, tambe lo traha riba un court multifunctional cu por wordo uza pa beach tennis, beach volley y beach soccer. E gazebo mei mei di e tennis courtnan lo bira un restaurant y lo renoba e trapi banda di esaki tambe uzando arte di mosaic. Tambe ta bay hala e turtle wall mas atras, yena e area cu santo blanco pa asina haci e beach mas grandi.
Turismo ta e driver di nos economia y pesei su desaroyo ta keda un prioridad. Pronto San Nicolas tambe ta bay haya su fair share den e desaroyo di nos pais ora e bunita proyecto aki finalisa.
Minister Oduber ta sigui percura pa proyectonan wordo ehecuta cu lo duna un balor agrega na producto Aruba.