𝗜𝗡𝗦𝗖𝗥𝗜𝗣𝗖𝗜𝗢𝗡 𝗔 𝗛𝗔𝗕𝗥𝗜 𝗣𝗔 𝗖𝗢𝗠𝗣𝗘𝗧𝗘𝗡𝗖𝗜𝗔 𝗗𝗜 𝗣𝗢𝗘𝗧𝗔 𝗗𝗜 𝗣𝗔𝗧𝗥𝗜𝗔 𝟮𝟬𝟮𝟯

𝘌𝘷𝘦𝘯𝘵𝘰 𝘭𝘰 𝘵𝘶𝘮𝘢 𝘭𝘶𝘨𝘢 𝘥𝘪𝘢 15 𝘥𝘪 𝘮𝘢𝘢𝘳𝘵 𝘥𝘦𝘯 𝘊𝘢𝘴 𝘥𝘪 𝘊𝘶𝘭𝘵𝘶𝘳𝘢
E preparacionnan ta andando di parti Comision Celebracion Dianan Nacional (CCDN), Departamento di Cultura Aruba (DCA), bou auspicio di Ministerio di Cultura hunto cu Comision Arte di Palabra (CAdP) y Fundacion Corector di Papiamento (FCdP) pa organisa un bes mas e prestigioso competencia di Poeta di Patria pa aña 2023.
Un invitacion na tur escritor, poeta y declamado di 21 aña of mas, pa haci e uzo di e oportunidad y inscribi pa participa. Trece bo inspiración y creacion y skirbi bo poema na nos dushi Papiamento.
E inscripcion pa Poeta di Patria ta habri. E evento Poeta di Patria 2023 lo tuma luga dia 15 di maart proximo, na Cas di Cultura. Por inscribi te cu dia 3 di maart y entrega di poema digital ta te cu dia 6 di maart 2023. Pa inscribi, manda un mail cu bo nomber y fam, number di telefon y fecha di nacemento. Pa entrega di poema digital, pone titulo di bo poema y nomber di autor.
𝘚𝘪𝘨𝘶𝘪𝘦𝘯𝘵𝘦𝘮𝘦𝘯𝘵𝘦 𝘢𝘭𝘨𝘶𝘯 𝘤𝘳𝘪𝘵𝘦𝘳𝘪𝘢 𝘤𝘶 𝘱𝘢𝘳𝘵𝘪𝘤𝘪𝘱𝘢𝘯𝘵𝘦𝘯𝘢𝘯 𝘮𝘦𝘴𝘵𝘦𝘳 𝘤𝘶𝘮𝘱𝘭𝘪 𝘤𝘶𝘯𝘦 𝘱𝘢 𝘱𝘰𝘳 𝘱𝘢𝘳𝘵𝘪𝘤𝘪𝘱𝘢:
E tema pa e aña aki ta “Aruba”
E participante por enfoca riba tur locual ta identifica cu cultura di nos Pais Aruba. E exigencianan pa un poema ta lo siguiente:
1). E poema mester tin entre 4 cu 9 strofa;
2). Cada strofa mester contene 4 verso (regel);
3). E poema por rima;
4). E poema mester ta na Papiamento;
5). E poema mester expresa mensahe relaciona cu e tema: Aruba y su Cultura;
6). Cada Poeta por participa cu un (1) poema;
7). Ultimo dia pa entrega ta: 4 di maart 2023.
Tur esnan interesa por manda nan poema na artedipalabra@gmail.com. Ta recorda cu tur participante mester tin minimo 21 aña.
𝘕𝘪𝘧𝘪𝘤𝘢𝘤𝘪𝘰𝘯 𝘥𝘪 𝘱𝘰𝘦𝘮𝘢/𝘱𝘰𝘦𝘵𝘢?
Un poema ta un texto poetico cu ta consisti di un of mas strofa. Un escritor cu ta skirbi poema, nos ta yama poeta. Un poeta ta expresa su emocion, sintimento y estado di animo pa medio di un poema. Mayoria biaha un poeta no ta conta un storia den un poema, pero e ta expresa emoción y pensamento.
𝘖𝘳𝘢 𝘥𝘪 𝘥𝘦𝘤𝘭𝘢𝘮𝘢 𝘶𝘯 𝘱𝘰𝘦𝘮𝘢, 𝘦 𝘱𝘰𝘦𝘵𝘢 𝘵𝘢 𝘩𝘢𝘤𝘪 𝘶𝘻𝘰 𝘥𝘪:
1. Lenguahe corporal,
2. Stem; bon uzo di entonacion y volumen
3. Articulacion: pronuncia e plabranan bon y cla.
4. E idea ta pa e traspasa sintimento p’e publico.
Pa mas informacion riba Competencia Poeta di Patria 2023 por haci esaki via di e mail artedipalabra@gmail.com of por yama na Departamento di Cultura tel: 5822185