Pa proyekto piloto di midi CO₂, Minister Pietersz- Janga ta risibí promé dispositivo pa midi CO₂ serka RAE Benelux

Willemstad – Resientemente representante di RAE Benelux señor Merlijn Brink a hasi un bishita di trabou na Ministerio di GMN relashoná ku atkisishon ku e ministerio a hasi di aparatonan pa midi i detektá gas. RAE Benelux ta liderá merkado internashonal riba tereno di dispositivonan pa detektá tur tipo di gas. Durante e bishita aki Minister Pietersz- Janga a risibí ofisialmente e promé dispositivo pa midi CO₂ pa un proyekto ku minister ta bai inisiá ku mas ministerio. Ministerio di GMN ya ta midi kalidat di airu den área industrial di Schottegat na 3 lokalidat figo i ku aparatonan móbiel di RAE Benelux.

RAE Benelux a opsekiá Ministerio di GMN e dispositivonan pa midi CO₂ komo muestra di apresio pa e bon koperashon. E dispositivonan ta pa un protekto piloto ku Minister Pietersz- Janga ta bai inisiá den koperashon ku mas ministerio pa monitoriá nivel di CO₂ den ofisianan i lokalidatnan di gobièrnu. Esaki pa trata na mehorá e kalidat di airu i ambiente pa esnan ku ta laborá òf bishitá e entidatnan aki. Simultániamente Ministerio di GMN a inisiá tambe un trayekto di koperashon ku islanan ruman Aruba, Boneiru i Sint Maarten.

Aktualmente Ministerio di GMN tin dispositivonan hopi sofestiká pa midi i detektá gas kual ta di sumo importansha pa un pais ku industria den desaroyo i en partikular industria petrolero pero tambe por ehèmpel importante pa trabou di Brandweer. Komo Kòrsou ta disponé di e aparatonan sofestiká aki, ta pone nan na disposishon tambe di islanan ruman Boneiru, Aruba i Sint Maarten. Den e kuadro aki a inisiá koperashonnan entre otro ku Brandweer i sektor industrial di e islanan. Ya tabatin enkuentronan na Boneiru i Sint Maarten kaminda a kuminsá formulá e liñanan di koperashon.

● Riba potrèt: momentu ku Minister Pietersz- Janga ta risibí dispositivonan pa midi
CO₂ for di Merlijn Brink di RAE Benelux.
● Riba potrèt di drpd; Direktor di Sektor Gabriel Murray, representante di RAE
Benelux señor Merlijn Brink, Minister di GMN drs. Dorothy Pietersz- Janga
i kolaboradornan di ministerio señores Renny Leitu i Edgarick Jansen.
● Riba potrèt: kolaboradornan di Ministerio di GMN huntu ku Merlijn Brink di RAE
Benelux despues di un enkuentro ku Brandweer di Sint Maarten.