Deliberashon ku minister di GMN tokante su karta pa e ‘vereffenaars’ di BZV i loke korte a konstatá den su veredikto.

Na Presidente di Parlamento di Kòrsou

Sra. C. America – Francisca

Wilhelminaplein #4

Presente

 

Kòrsou, 5 di mart 2023

 

Tópiko : deliberashon ku minister di GMN tokante su karta pa e ‘vereffenaars’ di BZV i loke korte a konstatá den su veredikto.

Apresiabel Sra. Presidente,

 

Suskritonan a tuma nota di e sentensia di dia 28 di febrüari 2023 i ta lamentabel pa konstatá ku minister di Salubridat, Medio Ambiente i Naturalesa, sra Dorothy Pietersz-Janga no a kumpli ku e mandato di Parlamento, formulá den e moshon di desaprobashon, fechá 28 di sèptèmber 2021/25 di novèmber 2021.

 

Den e moshon ariba menshoná, Parlamento a konstatá ku e akshon di Minister Pietersz -Janga, a tacha pais su demokrasia i a kondená e akshon aki den un moshon di desaprobashon.

 

Komo desishon di un mayoria den Parlamento a eksigí pa minister hasi tur lo posibel pa anulá e efekto di e karta. Ku asombro suskritonan ta konstatá ku no solamente Minister no a hala e karta bèk aden, si no, ku e akusadonan den e kaso a usa minister su karta komo parti di nan defensa. Hustamente loke Parlamento kier a evitá. Korte den su veredikto ta afirmá ku Minister Pietersz-Janga a intervení den un kaso den korte. Esaki ta un afirmashon grave, i ta konstituí un violashon di nos lei di integridat.

Veredikto di korte di Apelashon – 28 febrüari 2023

 

 

Parlamento komo órgano ta un di e tres podernan di ‘Trias Politika’, ku e tarea pa kontrolá e trabounan di e poder ehekutivo. Na momento ku parlamento konstatá ku tin falta den e maneho di e poder ehekutivo i hasi e petishon pa korekshon por medio di un moshon, mas ainda moshon di desaprobashon, esaki mester ta un señal fuerte den direkshon di e Minister i Gobièrnu. Ignorá esaki ta trese un kiebro den konfiansa di Parlamento den e Minister. Konfiansa ku e Minister ta respetá ‘Trias Politika’, e prinsipio riba kua nos demokrasia ta basá.

 

Den kuadro di esaki i hasiendo uso di artíkulo 96 di Reglamento di Órden, frakshon di PAR i MAN ta pidi Presidente di Parlamento pa yama un reunion públiko ku karakter di urgensia. Pa e reunion públiko nos ta pidi presensia di Minister di Salubridat, Medio Ambiente i Naturalesa, sra. Dorothy Pietersz- Janga.

 

Atentamente,

 

Frakshon di PAR i Frakshon di MAN