𝗕𝗼𝗺𝗯𝗲𝗿𝗼𝗻𝗮𝗻 𝗹𝗼 𝘁𝗮 𝗺𝗮𝘀 𝘀𝗲𝗿𝗸𝗮 𝗱𝗶 𝗽𝘂𝗲𝗯𝗹𝗼 𝗱𝘂𝗿𝗮𝗻𝘁𝗲 𝗙𝗜𝗥𝗘𝗙𝗜𝗚𝗛𝗧𝗘𝗥𝗦 𝗪𝗔𝗟𝗞 𝟮𝟬𝟮𝟯

𝗕𝗼𝗺𝗯𝗲𝗿𝗼𝗻𝗮𝗻 𝗹𝗼 𝘁𝗮 𝗺𝗮𝘀 𝘀𝗲𝗿𝗸𝗮 𝗱𝗶 𝗽𝘂𝗲𝗯𝗹𝗼 𝗱𝘂𝗿𝗮𝗻𝘁𝗲 𝗙𝗜𝗥𝗘𝗙𝗜𝗚𝗛𝗧𝗘𝗥𝗦 𝗪𝗔𝗟𝗞 𝟮𝟬𝟮𝟯

WILLEMSTAD – Djadumingu 2 di aprel próksimo, pueblo di Kòrsou kompletu lo por sera konosí ku tur nos bomberonan durante di Firefighters Walk 2023. Promé ku nos a konosé 2 aña di Covid-19, Sport en Ontspanningsvereniging di Brantwer Kòrsou a organisá 3 aña sigí nan kaminata titulá “Firefighters Walk.” Durante Covid-19, no tabata tin espasio pa organisashon di un kaminata, pero nos frontliners nan ta kla, pa laga pueblo di Kòrsou bini i sera konosí ku e tremendo ambiente di nos pagadó nan di kandela.

Djadumingu 2 di Aprel, for di 5or di mainta, komunidat lo por pasa na pòst di Brantwer na Steenrijk, pega ku ADC Vredenberg unda nan lo por hasi uso di e bus di salu. Aki nan lo por prek pa kontrolá nan suki, kolesteròl i preshon. Pa 6or di mainta lo kuminsá ku un warm up, kaminda tur presenté lo por lòs e spiernan, pa despues mitar di 7 enpunto ranka sali for di Brantwer Steenrijk direkshon di Playa Parasasa.

Durante di e kaminata aki, lo por skohé entre dos ruta, kual ta 7 KM ku ta pasa via di brug Emma òf e ruta di 10 KM ku ta pasa via di brug Juliana. Ambos ruta lo tèrminá na Playa Parasasa kaminda lo tin tremendo ambiente i ku chèns di gana un pasashi pa bo destinashon faborito kortesiá di JetAir Caribbean.

Ta bon pa remarká ku durante di e ruta di Firefighters Walk lo tin vários sorpresa ku e bomberonan a prepará pa tur partisipante i na final lo tin konsumo kortesiá di Coca-Cola, Distribier i EWT pa tur persona.

Karchinan ta optenibel na Mensing Caminada, na ofisina prinsipal di Brantwer Kòrsou na Roodeweg # 188 òf serka bomberonan na pòstnan di Brantwer. Kada karchi tin un kosto di 20 florin kual ta inkluí un bunita tshirt pa e kaminata huntu ku e konsumo na final. SOV Brantwer Kòrsou ta invitá komunidat kompletu pa bin kana durante di Firefighters Walk 2023, paso e kaminata lo bai ta sendeeeeee.