Dia 2 i 3 di yüni den Curaҫao Festival Center: Caribbean Sun Splash Festival ta presentá Rema, Ashanti, JaRule i hopi mas na Kòrsou!

Dia 2 i 3 di yüni den Curaҫao Festival Center:

Caribbean Sun Splash Festival ta presentá

Rema, Ashanti, JaRule i hopi mas na Kòrsou!

 

WILLEMSTAD: Djamars último Sun Splash Events a tene un konferensia di prensa na Mangrove Beach Corendon Curaçao den kual e organisashon a konfirmá nan line-up pa e festival ku lo ta riba dos dia; djabièrnè i djasabra dia 2 i 3 di yüni próksimo. Despues di un fantástiko konsierto di Burna Boy na òktober di aña pasá e organisashon Sun Splash mesora a kuminsá traha riba e siguiente proyekto. E biaha aki un festival ku 12 artista repartí den 2 dia di ambiente, dushi kuminda, goso i un variashon amplio di músika. E bishitante di e festival lo haña un eksperensia total ku diferente área; entre nan un ‘food court’, un área eksklusivamente pa presentashon di DJ internashonal i naturalmente e área mas grandi, pa e konsiertonan. Sun Splash Events NL a enfatisá durante di e konferensia di prensa ku ta trata di un festival i ta nan deseo pa públiko eksperensia esaki komo tal. Ta p’esei mes, lo pone hopi atenshon tambe na e ‘food court’ di manera ku bishitantenan por disfrutá di e kushina afrokaribense tambe.

 

Por konfirmá ku riba djabièrnè dia 2 di yüni lo presentá; Icons, Amanye, Irsais i e semper popular Ashanti i JaRule. Miéntras ku riba djasabra dia 3 di yüni lo tin presentashon di Buleria, Lymie Murray, La Rouge, Mr. Vegas, Musa Keys, Gentleman i e fenomenal artista di afro-beat Rema. Tambe riba djasabra lo tin un área dediká na DJ ku lo ta biniendo Kòrsou for di diferente region e.o Krokkz (CUR), Robin Roxette (NL), JP (NL), King Kambe (SXM), Dj Nova (JAM), Dj Jah (NL), Dj MBA (NL), Dj Don Stone i MC Chris Strick!

 

E promé Caribbean Sun Splash Festival

Na mesa di konferensia tabata Carmela Poleon di Sun Splash Events NL,  Mike Bosman General Manager di Mangrove Beach Corendon Curaçao i Djiwan Gonesh di Massive Productions.  Sun Splash Events NL ya bon konosí, ta un organisashon ku ta produsí diferente festival Afro na Hulanda i ta forma ekipo ku un tim lokal pa e biaha aki presentá su promé festival na Kòrsou. Manera a keda divulgá durante di e konferensia di prensa, Massive Productions un biaha mas a keda apuntá i enkargá ku zonido, esenario, lus i produkshon den Curaҫao Festival Center. Mangrove Beach Corendon Curaçao lo ta kas di e artistanan ku ta yegando for di djaweps dia 1 di yüni di manera ku nan por kuminsá disfrutá di Kòrsou.

 

Formando parti di e promoshon lo tin diferente ‘gimmick’ riba karchi, i patrosinadornan lo ta aktivo ku diferente kampaña; fanátikonan mester keda pendiente! Karchinan ya ta na benta i mester bisa tin un ritmo alentador; Kòrsou di bèrdat ta deseá un festival asin’aki. Sun Splash Events NL ta premirá ku lo tin hopi bishitante for di eksterior konsiderando e entusiasmo grandi for di Aruba, St. Maarten, Sürnam i te hasta Hulanda. Esaki mes ta hasi ku por konfirmá ku JetAir a habri buelonan èkstra pa akomodá fanátikonan di e 12 artistanan ku lo ta biniendo Kòrsou pa dianan 2 i 3 di yüni próksimo. Pa mas informashon i karchi por bishita https://tibbaa.com/SunSplash òf 24uur Uit de Muur, Madero Boutique i Van den Tweel.