Problema nan pa ku petishon di ònderstant (pa personanan ku ta sufri di malesa ku no por traha mas)
Na: Minister di di Desaroyo Sosial, Labor i Bienestar
Sra. Ruthmilda Larmonie-Cecilia
Prinsenstraat #86
Willemstad 24 Aprel 2023
Tópiko: Problema nan pa ku petishon di ònderstant (pa personanan ku ta sufri di malesa ku no por traha mas)
Honorabel sra. Larmonie-Cecilia,
Den un kombersashon ku mi tabata tin resientemente ku Stichting Prinses Wilhelmina Fonds (PWF) mi a wòrdu atendé di e siguiente problema. Personanan ku ta nan propio doño di trabou esta esun yama ‘zelfstandige ondernemer’ (ZZP-er) ku ta wòrdu konfrontá ku e malesa di kanser, tin ku warda hoy en dia sigur un 7 luna pa nan por bini na remarke pa risibí ònderstant for di ora ku nan hasi petishon na ministerio di SOAW.
Sigun PWF, ken ta yuda personanan ku e malesa di kanser ku no por traha mas; apliká pa ònderstant, e proseso aki tabata dura ántes no mas ku 3 luna. E rason ku ta apliká pa ònderstant tin di aber ku e grupo aki di ZZP-er den mayoria kaso no ta bin na remarke pa ‘loonderving’ i pues tin ku apliká pa ònderstant.
Manera nos tur por komprondé, un hende ku pa konsekuensia di malesa no por traha mas i pa kolmo tin ku warda 7 luna pa risibí ònderstant pa e por sobrebibí finansieramente, ta hasi e situashon hopi mas erg ku e ta kaba.Banda di dil ku tratamentu di kanser e stress ku ta bin aserka di no tin un entrada tin su efektonan nagativo riba e persona.
PWF ta splika tambe ku ora hasi e petishon, nan no ta risibí un konfirmashon (terugkoppeling) ku e aplikashon a wòrdu risibí i e siguiente pasonan òf tempu di espera ku ta mara na esaki i tampoko tin un persona fiho di kontakto manera un ‘Case Manager’ ku nan por akudí na dje ku pregunta òf status di e aplikashon.
Tambe PWF ta splika ku aplikashon pa ònderstant ta sosodé di forma digital. Esaki tambe ta trese su retonan kuné ya ku tin ku komprondé ku no ta tur hende tin internèt na kas kual ta hasi e proseso pa apliká pa ònderstant ainda mas difísil komo esaki por bai (solamente) via wèpsait di SOAW.
Pa e motibunan ariba menshoná, konforme artíkulo 96 di Reglamentu di Òrdu, suskrito ta puntra Minister di SOAW enkaresidamente pa por fabor kontesta di forma urgente e siguiente preguntanan:
- Tin un diferensia den tempu di espera si ta un aplikashon pa ònderstant hasi dor di un persona ku ta sufri di e malesa?
- Kiko ta e rasonnan dikon un petishon pa ònderstant ta tarda 7 luna? Minister por splika dikon e proseso aki ta tuma asina tantu tempu?
- Kiko Minister ta bai hasi òf ta hasiendo kaba pa atendé ku problemátiko aki?
- Dikon no tin “terugkoppeling” ora hasi un petishon pa ònderstant (pa kasonan médiko)?
- Tin otro manera ku no ta via wèpsait di SOAW pa hasi petishon pa ònderstant?
Atentamente,
Steven Croes
Frakshon di PAR
