CBCS ta publiká investigashon riba e efektonan di red tape Gobièrnu i sektor privá mester tuma medida pa redusí “red tape”

REDAKSHON June 1, 2023 0 Comments

WILLEMSTAD/PHILIPSBURG — Un investigashon realisá pa Centrale Bank van Curaçao en Sint
Maarten (CBCS) tantu na Kòrsou komo na Sint Maarten ta mustra ku e institutonan finansiero,
Landsontvanger, i e kompanianan di utilidat ta den e tòp 5 di instituto ku ta generá mas tantu
peso atministrativo debí na ‘red tape’. E resultadonan di e investigashon ta mustra ku no ta
gobièrnu so lo mester tuma medida pa eliminá òf a lo ménos redusí red tape, sino tambe algun
instituto di sektor privá. ‘Esaki lo kontribuí na un mihó klima di invershon i lo oumentá e aporte
di e negoshinan na ekonomia di Kòrsou i di Sint Maarten’, segun spesialista di Economic
Analysis & Research di CBCS, Reggie Martes.
Den kuadro di e investigashon, di desèmber 2021 pa febrüari 2022, a tene un enkuesta online bou
di e empresanan privá na Kòrsou i Sint Maarten, den kolaborashon ku Kámara di Komèrsio di
Kòrsou i esun di Sint Maarten. A formulá e enkuesta a base di literatura riba e tópiko aki i ku aporte
di eksperto. Na tur, 775 empresa a kompletá e enkuesta: 440 na Kòrsou i 335 na Sint Maarten. E
enkuesta a inkluí preguntanan tokante e karakterístikanan di e empresa, e gastunan pa kumpli ku
regulashon i rekisito atministrativo, i rekomendashon pa redusí red tape.
E investigashon ta duna un análisis detayá di e peso ku e negoshinan ta eksperensiá relashoná ku
kumplimentu ku regla i rekisito atministrativo. Na ámbos pais, e negoshinan a duna di konosé ku
e proseso di ‘follow-up i komunikashon ku e instansianan reguladó’ i ‘ouditoria i supervishon di
kumplimentu’ ta e dos kategorianan di rekisito mas pisá pa nan. Na Kòrsou, komo promedio, ta
ouditoria i supervishon di kumplimentu a okashoná mas kosto, miéntras ku na Sint Maarten, e
proseso di follow-up i komunikashon ku e instansianan reguladó tabata mas kostoso.
Pa loke ta trata kosto, e partisipantenan di ámbos pais a indiká ku kumplimentu ku regla di
impuesto ta e aktividat mas kostoso. Fuera di esei, e empresanan a duna di konosé ku ta difísil pa
optené krédito (manera fiansa i aprobashon di krédito) i risibí un konekshon di koriente. Na Sint
Maarten, e partisipantenan a indiká ku habrimentu di un negoshi (optené number di
registrashon/crib) ta un proseso largu. Na Kòrsou, hañamentu di pèrmit, manera di konstrukshon,
di establesimentu i di divisa, ta trese mas peso kuné.
Na ámbos pais, e partisipantenan a duna di konosé ku, komo promedio, ta dura seis luna pa habri
un negoshi i ku esei ta debí prinsipalmente na e tempu largu di espera pa por haña pèrmit i habri
kuenta di banko. Pa resolvé esaki, e partisipantenan a sugerí pa digitalisá i sentralisá proseso,
informashon i registrashon, redusí e tempu ku ta tuma pa risibí feedback i pa atendé papeleo,
eliminá pèrmit innesesario i, por último, traha riba mas kolaborashon i interkambio di dato entre e
institutonan i hasi e prosedimentunan nesesario mas transparente.
CBCS ta masha kontentu ku e kolaborashon fruktífero ku Kámara di Komèrsio i Industria di Kòrsou
i ku Sint Maarten Chamber of Commerce & Industry. Mas ku tur, CBCS ke gradisí tur empresa
partisipante pa nan aporte balioso na e investigashon akí!
E informe di investigashon ta disponibel na https://www.centralbank.cw/functions/research.