Minister Javier Silvania DI AKUERDO KU IMF DESPUES DI UN PERIODO LARGU DI KONTRAKSHON EKONOMIKO, EKONOMIA DI KORSOU TA MUSTRA UN KRESEMENTU FUERTE.

Minister Javier Silvania

DI AKUERDO KU IMF DESPUES DI UN PERIODO LARGU DI KONTRAKSHON EKONOMIKO, EKONOMIA DI KORSOU TA MUSTRA UN KRESEMENTU FUERTE.
Dia 24 di mei ultimo IMF a konkluí nan mishon na Korsou emitiendo e asina yamá “Concluding Statement”. Di akuerdo ku Fondo Monetario Internashonal (IMF), despues di un periodo largu di kontrakshon ekonómiko, ekonomia di Kòrsou ta rekuperando danki na un kresementu fuerte den e sektor di turismo i inbershonnan kuantioso den sektor privá. Di akuerdo ku IMF, realisando Kòrsou su gran potenshal ekonómiko ta rekerí un strategia di desaroyo fuerte ku un amplio sosten di tur esnan enbolbí. E desishon resientemente tumá pa adoptá un norma di debe a largo plaso ku un strategia pa inbershon ta un bon stap pa desaroyá un kuadro fiskal pa término medio. Nan ta sigi bisa ku esfuersonan kontinuo ku e sektor finansiero ku reformanan structural ta keda di vital importansia pa fortifiká stabilidat finansiero i e posishon eksterno di e union monetario di Kòrsou i Sint Maarten.
Na aña 2021 Kòrsou su ekonomia a krese ku 4.2% i IMF ta kalkulá ku pa 2022 e kresemento tabata 6.5%. Nan ta proyektá ku e kresemento lo sigi durante 2023 i 2024 ku un porsentahe moderá di 3%. Inflashon ta proyektá un moderashon di 3.7% na 2023 pa 2.0% den termino medio.
Pa loke ta trata e maneho di finansas públiko, IMF ta bisa ku durante e ultimo dos añanan aki hopi progreso a ser realisá. E balanse fiskal ta mustra un surplus di 0.4% di nos Produkto Interno Bruto (PIB) pa aña 2022 kual ta representá un mehoransa di e defisit di 1.6% di PIB na aña 2019. Esaki ta danki na mas entrada ku tabata resultado di entre otro mehoramento di e atministrahon di impuesto i kobransa di impuestonan atrasá.
Pa futuro e maneho mester ta dirigí pa mehorá e kalidat di gastonan enfatisando inbershonnan ku ta promové kresemento ekonomiko. Esfuersonan pa mehorá e atministrashon di impuesto mester kontinuá sigí pa reforma di e maneho di impuesto.
Tambe IMF ta sigi bisa ku modernisashon di e aparato gobernamental lo mehorá efisiensia i e kalidat di servisio públiko. Reforma integral di e sektor di salubridat tambe ta nesesario pa garantisá kontinuidat di servisio di salubridat, re-establesé su viabilidat finansiero i limitá riesgo finansiero.
Tambe IMF ta mustra riba e nesesidat pa un strategia sosial integral. Esaki ta nesesario pa yuda esnan mas vulnerabel den nos sosiedat ku a ser afektá dor di diferente akontesimientonan resientemente.
Ku bista riba e diferente akontesimientonan ku a afekta nos ekonomia negativamente resientemente, Kòrsou lo benefisiá dor di desaroyá un strategia di desaroyo nashonal. Esaki mester enserá un vishon a largo plaso pa nos ekonomia. Un bon klima di inbershon ta inpresindibel pa oumentá kresemento. Integrá adaptashon di kambionan klimatológiko tambe ta importante pa un kresemento sustenibel.
E institutonan enkargá pa kombatí labamentu di plaka i finansiamento di terorismo mester di fortifikashon kontinuo di akuerdo ku e standartnan di Financial Action Task Force.
Mas rekurso pa Buro di Estadístika (CBS) lo mehorá tomo di desishon.
Pa loke ta trata e situashon monetario, e royekt riba e kuenta koriente di nos royekt di pago a keda haltu durante 2022 pero ta ser royekto ku esaki lo bira menos riba término medio.