EMPRESARIOMAN COLOMBIANO TA EKSPLORA KÒRSOU KOMO PUNTO PA SIGUI DESAROYA NAN NEGOSHI FOR DI NOS ZONANAN EKONÓMIKO

EMPRESARIOMAN COLOMBIANO TA EKSPLORA KÒRSOU KOMO PUNTO PA SIGUI DESAROYA NAN NEGOSHI FOR DI NOS ZONANAN EKONÓMIKO

Willemstad 29 di Ougustus 2023- Un grupo di empresario for di e siudatnan di Medellin, Maicao, Rio Hacha i Dibulla na Colombia resientemente a bishitá Kòrsou den nan afán di eksplorá posibilidatnan pa nan por sigui ekspandé nan negoshi pafó di Colombia.  Na e okashon aki e delegashon a keda enkabesá pa e Alkalde di Dibulla,  Sr. Marlon Amaya i Alkalde di Maicao, Sr. Mohamad Hajj. Durante di un programa basta intensivo e delegashon a será konosí i eksplorá e posibilidatnan ku nos Zonanan Ekonómiko i Parke Industrial ta ofresé. Ganesh, un kompania ku tin años establesé den e zona ekonómiko, a risibí e delegashon durante di nan bishita den Zona Ekonómiko na Koningsplein i Sr. Gulu Buxani i su staf a interkambiá di idea ku e empresarionan. Komo parti di e bishita na Kòrsou, Curaçao Industrial and International Trade Development Company N.V. (Curinde) i Agribusiness a organisá un enkuentro pa “networking” pa e grupo Colombiano por a topa ku empresarionan lokal i eksplorá posibilidatnan pa hasi negoshi.  Na e okashon aki a hiba palabra Minister Ornelio Martina den representashon di Minister di Desaroyo Ekonómiko Sr. Ruisandro Cijntje.

E bishita di e delegashon aki for di Colombia ta un esfuerso kombiná di Curinde i Agribusiness.  Kòrsou tin un ‘Memorandum of Understanding’ firmá ku Rio Hacha i bal hasi uso di esaki pa engrandesé aktividatnan ekonómiko ku e akuerdo aki komo base. E bishita di e delegashon di empresarionan for di e 4 siudatnan ta parti di Curinde su afan pa atraé mas aktividat ekonómiko pa Kòrsou en general, komo tambe pa nos Zonanan Ekonómiko i Parkenan Industrial en partikular. E empresarionan, di kua mayoría su empresa ta den sektor di produkshon, a keda hopi entusiasmá ku e posibilidatnan ku Curinde i Kòrsou por brinda nan pa sigui desaroyá nan aktividatnan.  Di e forma aki nan por logra yega mas merkadonan atraves di e plataforma di Curinde su parkenan empresarial.

Curinde ke gradisí CTB, Ministerio di Desaroyo Ekonómiko, Sr. Buxani di Ganesh i sektor privá ku a kontribuí pa e bishita aki bira un eksitoso.  Curinde ta sigui den su afan pa atraé mas aktividat ekonómiko pa Kòrsou komo tambe pa e Zonanan Ekonómiko i Parkenan Industrial.