GRAN FINAL DI KAMPIONATO FEMENINO 22-23 PA KATEGORIA U-17 I SENIOR, 30 DI SÈPTÈMBER DEN STADION RIGNAAL ‘JEAN’ FRANCISCA!

Despues di e gran final di kategoria U-15, e siguiente kategorianan ku lo mira nan partidonan final di Kampionato Femenino 22-23 lo ta kategoria U-17 ku Senior.

Esaki, ora ku djasabra 30 di sèptèmber 2023 pa mitar di 5 di atardi Jong Colombia enfrentá Jong Holland den kategoria U-17 miéntras Excellence School lo topa Hubentut Fortuna pa 6’or di atardi den Stadion Rignaal ‘Jean’ Francisca.

 

Kampionato Femenino 22-23 ta yegando su final despues di a inisiá dia 11 di novèmber 2022 ku un total di 4 ekipo den kategoria U-17 i 7 ekipo den Senior ku tur wikènt tabata kompetí ku otro den Stadion Rignaal ‘Jean’ Francisca.

 

Centro Juve, Jong Colombia, Jong Holland i Excellence School tabata e ekiponan ku a partisipá den kategoria U-17 i a hunga e sistema di 7 vs 7.

Den kategoria Senior, Excellence School, Hubentut Fortuna, Undeba, Inter Willemstad, Jong Colombia, Jong Holland i SUBT tabata kompetí ku otro. Despues di e temporada regular i e partidonan di ‘play off’, e 2 ekiponan ku a klasifiká pa e partidonan final aki lo bin tur ku tin pa bai ku e título máksimo di kategoria U-17 i Senior.

Awor ku e temporada aki lo yega na su final, nos damanan lo kuminsá prepará pa e próksimo temporada ku lo inisiá pronto.

 

Skema partidonan final;

 

Tereno	Kategoria	Tim di Kas	v/s	Bishitante	U-17	Senior
FFK	U-17	Jong Colombia	v/s	Jong Holland	16:30	–
FFK	SENIOR	Excellence	v/s	Hubentut Fortuna	–	18:00

 

Komishon Femenino ta deseá Jong Colombia, Jong Holland, Excellence School i Hubentut Fortuna tur klase di éksito ku e partidonan final pa kategoria U-17 i Senior di Kampionato Femenino 22-23.

 

Un invitashon ta bai na pueblo di Kòrsou kompletu pa bin apoyá bo ekipo preferí durante e delaster partido di kategoria U-17 ku Senior pa Kampionato Femenino 22-23.

 

Nos damanan ta wardabo…kòrda ku tur e partidonan aki ta grátis!

 

27 sèptember 2023