SERVISIO DI ATMISHON TA ADAPTÁ FORMULARIONAN PA PETISHON DI ESTADIA

Willemstad – Servisio di Atmishon ta introdusí entrante 15 di novèmber 2023, formularionan adaptá pa deklarashon di garantia, deklarashon di doño di trabou, deklarashon di studiante i e asina yamá ‘Kennisgeving Definitief Vertrek’. Introdukshon di e formularionan adaptá tin un periodo di transishon di tres luna. Entrante 15 di febrüari 2024 e formularionan bieu no ta bálido mas.

Deklarason di garantia, doño di trabou, studiante i tripulashon naval
Na momentu ku ta entregá un petishon kual mester hasi uzo di un di e deklarashonnan menshoná, mester pega un stampia di naf. 10,= riba esakinan. Riba e formulario tin un hòki spesial pa pega e stampia . Entrante 15 di febrüari 2024 no ta tuma deklarashonnan ku ta keda modifiká. Riba e wèpsait di Servisio di Atmishon www.immigrationcur.org por download e formulario nobo na kuater idioma.

Baimentu definitivo
Servisio di Atmishon ta introdusí tambe un formulario nobo pa ‘Kennisgeving Definitief Vertrek’. E formulario akí ta keda uzá na momentu ku un ekstranhero ta bandoná pais definitivo. E estranhero ta traha un sita pa pasa na Servisio di Atmishon pa tuma e formulario, despues di a hasi pago di tarifa i retribushon pa e prosedura akí. Ku e formulario akí e estranhero ta tuma un stèmpel na Parkèt di Ministerio Públiko i dos stèmpel na Ofisina di Impuesto. Despues e estranhero ta akudí na Kranshi. Por último, ta regresá Servisio di Atmishon ku e formulario yená ku e stèmpelnan i tambe e komprobante di Kranshi ku a kita nòmber.

Entrante 15 di febrüari 2024 e formularionan bieu no ta bálido mas. Si un ekstranhero tin e formulario bieu pa e proseso di baimentu definitivo, mester akudí na Servisio di Atmishon pa kambia esaki pa e formulario nobo. Servisio di Atmishon ta pidi pa tene kuenta ku e kambionan aki.

Pa mas informashon i tambe formulario por subi wèpsait di Servisio di Atmishon www.immigrationcur.org, awor na kuater idioma.