‘LIFE AFTER FOOTBALL’ KU TREMENDO KLÍNIKA AKI NA KÒRSOU! 18 DI NOVÈMBER 2023, 10’OR DI MAINTA DEN STADION RIGNAAL ‘JEAN’ FRANCISCA!
‘LIFE AFTER FOOTBALL’ KU TREMENDO KLÍNIKA AKI NA KÒRSOU!
18 DI NOVÈMBER 2023, 10’OR DI MAINTA DEN STADION
RIGNAAL ‘JEAN’ FRANCISCA!
E organisashon ‘Life After Football’ lo organisá un klínika di futbòl riba djasabra 18 di novèmber 2023. E klínika aki lo tuma lugá den Stadion Rignaal ‘Jean’ Francisca di 10’or di mainta pa 12’or di mèrdia. Dirk Kuyt huntu ku Ron Vlaar, Eljero Elia i Ryan Babel ta na enkargo pa duna e klínika aki. Tur ta eks futbolistanan profeshonal di renombre ku lo tei aki na Kòrsou pa kontribuí ku e bunita proyekto aki.
Durante e klínika, 25 hungadó di nos selekshonnan nashonal hubenil lo haña diferente training i ehersisio kaminda nan lo por desaroyá nan abilidatnan futbolístiko aun mas. Tur esaki ku e meta pa pasa nan konosementu na e hungadónan di nos selekshonnan hubenil ku ta e futuro di nos futbòl. Un oportunidat úniko pa nos hungadónan ku sigur lo benefisiá nos selekshonnan hubenil den futuro.
Na final di e klínika e hungadónan di nos selekshon nashonal senior huntu algun eks futbolista profeshonal mas manera; Orlando Engelaar, Diego Biseswar, Gianni Zuiverloon i Ryan Donk lo tei na vèlt pa saka protrèt, repartí firma i sera konosí mas di aserka ku e públiko presente.
E klínika aki ta kompletamente grátis i tur hende ta keda kordialmente invitá pa bin presensiá e gran evento aki, sera konosí ku eks futbolistanan profeshonal i pasa un ratu ameno den kompania di bo famia.
FFK ta wardabo!
16 novèmber 2023
