Gobièrnu di Kòrsou den un rueda di prensa a informá ku e organisashon ku lo ta enkargá pa organisá eventonan pa Seú 2026 lo ta Fundashon J.A.G.( Juni Aniceta i su Grupo)
Willemstad, 20 di febrüari 2026.
Djabièrnè dia 20 di febrüari 2026, gobièrnu di Kòrsou den un rueda di prensa a informá ku e organisashon ku lo ta enkargá pa organisá eventonan pa Seú 2026 lo ta Fundashon J.A.G.( Juni Aniceta i su Grupo)
Durante di e rueda di prensa akí, Sra Lizette Sambo – Velder, a hiba palabra den representashon di Minister di Enseñansa, Siensia Kultura i Deporte, i a pidi prensa i tambe pueblo di Kòrsou pa sostené e organisashon den e temporada i a enfatisá riba e lema : ‘Si lantera kai, kunuku lo tap’é’, ku ta nifiká: si bo no konosé bo historia, bai bo rais bai busk’é.
Den e kuadro akí, lo bai pone énfasis riba e parti di edukashon kultural tantu den skolnan i tambe barionan. Presidente di Fundashon J.A.G., a presentá e kalendario i tambe kada kordinadó di e diferente evento a duna informashon.
E aktividatnan ku ta plania e aña akí lo ta:
- 8 di mart 2026; kompetensia di mara lensu & instalashon ofisial di partisipantenan pa e elekshon kultural 2026.
- 10 di mart 2026: apertura kunuku Shon Mi & klousurá inskripshon pa É Kantadó Mayó
- 14 di mart 2026: Elekshon Kultural 2026
- 17,18,19 i 21 di mart 2026: É Kantadó Mayó 2026
- 22 di mart 2026: Elekshon Wela Seú 2026
- 28 di mart 2026: Bos di Kunuku 2026
- 6 di aprel 2026: Marcha Seú 2026
- 10 di aprel 2026: Marcha di grandinan di Habaai
- 12 di aprel 2026: Marcha Seú Banda Bou 2026
- 26 di aprel 2026: Klousura temporada di Seú 2026
Elekshon kultural 2026
Durante di e elekshon akí lo bai saka e siguiente Reina Seú Kòrsou 2026 i nos promé Rei Kosecha Kòrsou 2026. Kriterianan pa partisipá ta
- Edat mester ta 17 aña bai ariba
- Mester representá un grupo di seú
- Tin amor pa kultura
Inskripshon ta habrí i ta sera djadumingu 22 di febrüari 2026, 7or di anochi. Por inskribí via nos páginal di Facebook: Fundashon JAG òf nos Instagram: fund,jag. Aki lo tin un lenk òf por skèn e qr-code ku lo manda bo direktamente na e lenk.
Despues ku inskripshon sera lo tuma kontakto ku tur partisipante pa tur sobrá informashonnan.
E Kantadó Mayó 2026
Boldstarz Foundation, un aña mas tin e enkargo pa organisá festival É Kantadó Mayó 2026, ku lo tuma lugá den kunuku di Shon Mi, dianan 17,18,19 i 21 di mart 2026 próksimo. Inskripshon a habri i por haña e lenk riba páginanan sosial di Fundashon J.A.G. ariba menshoná i tambe Boldstarz Foundation.
Dia 10 di mart 2026, e inskripshon akí ta sera pa asina trabounan kontinuá pa un biaha mas krea un eksperensia úniko pa tantu e bishitantenan komo e partisipantenan. Pa kualke pregunta por tuma kontakto ku Boldstarz Foundation na number 5673746 Naila òf 5132247 Liesje.
Inskripshon pa gruponan di Seú 2026
Pa forma parti di nos marcha kultural tambe por bai riba páginanan sosial di Fundashon J.A.G. pa haña e lenk i tambe e qr-code pa skèn.
– lenk: https://qrco.de/bgdMy4
Inskripshon pa gruponan lo sera dia 10 di mart 2026, pa 6or di atardi. Despues lo tuma kontakto ku tur lidernan di grupo pa sobra informashon. Un súplika ta bai na tur gruponan, pa yena tur informashonnan korekto.
Fundashon J.A.G. ta honrá di tin Ultimate Automobiles, e prestigioso agensia di outo marka Chery, komo e spònser mayó ku ta sostené e organisashon i aportá na nos fiesta kultural.
Pa informashon por tuma kontakto ku fundashon J.A.G. na: 6628777 òf via seufundashonjag@gmail.com
