Gobièrnu di Kòrsou ta reakshoná riba informenan tokante Reunion di e Benefisiarionan di Banko Sentral

Willemstad – Djadumingu 8 di mart 2026, Na kuminsamentu di siman pasá, medionan di komunikashon a informá tokante e Reunion di Benefisiarionan di Banko Sentral di Kòrsou i Sint Maarten (CBCS), ku a tuma lugá na Kòrsou dia 26 di febrüari 2026. Mas aleu, dia 3 di mart último, den Parlamento di Sint Maarten, e Minister di Finansa di Sint Maarten, Sra. Marinka Gumbs, a akusá e Minister di Finansa di Kòrsou, Sr. Charles Cooper, di no a tene su mes na supuesto palabrashonnan hasí ku su predesesor, Sr. Javier Silvania. Relashoná ku esaki Gobièrnu di Kòrsou ta konsiderá importante pa duna públiko informashon korekto pa prevení un mal impreshon den medionan di komunikashon.

Ta públikamente konosí ku aña pasá e Minister di Finansa di Sint Maarten a purba pa nombrá un persona di Sint Maarten komo presidente di e Hunta di Komisario di CBCS. Sinembargo, E intento aki no tabata eksitoso pasobra e no a kumpli ku e rekisítonan legal pa nombra komisarionan den CBCS. E statutonan di CBCS ta stipulá ku e nombramentu di komisarionan ta basá riba un rekomendashon di Hunta di Komisarionan di CBCS mes na e ministernan di finansa di Kòrsou i Sint Maarten, despues di kua e gobièrnunan di e paisnan ei por tuma un desishon.

Durante e Reunion di Benefisiarionan di CBCS dia 26 di febrüari, na kua gobièrnu di Kòrsou tabata representá pa Minister di Finansa Charles Cooper, Minister di Finansa di Sint Maarten, Sra. Gumbs, a eksigí pa otorgá e presidensia di Hunta di Komisarionan di CBCS na Sint Maarten den e próksimo proseso di nombramentunan. Akinan e la indiká ku e tabatin un palabrashon ku eks Minister di Finansa di Kòrsou pa loke ta nombramentu di e presidente di e Hunta di Komisarionan. Sinembargo esaki no ta dokumentá ningun kaminda, miéntras ku e eks Minister di Finansa di Kòrsou, Sr. Silvania, a deklará públikamente ku no tabata eksistí tal akuerdo durante su periodo komo minister.

Un situashon den kual Sint Maarten, komo e akshonista di mas chikitu (mas o ménos 20%), tin e presidensia di e Hunta di Komisarionan i tambe ta nombra mitar di e miembronan di e Hunta di Komisario no ta aseptabel pa Kòrsou, ku tin un interes ekonómiko di 80% den CBCS.

Mas aleu, debí na e sobrerepresentashon di Sint Maarten den e Hunta di Komisarionan, entre otro debí na su derecho pa nombra mitar di e miembronan ordinario di Hunta di Komisarionan i e obligashon di su konsentimentu ora di nombra un Presidente di Hunta di Komisarionan, pa añanan largu por eksistí un impase polítiko entre Kòrsou i Sint Maarten pa loke ta trata e nombramentu di miembronan di Hunta di Komisarionan. Esaki tabata e eksperensia pa hopi aña te ku awor. Pa motibu di e falta di konsenso entre e paisnan, un gran kantidat di e komisarionan for di 10 di òktober 2010 no a wòrdu nombrá pa e gobièrnunan, sino pa e Presidente di Korte Komun di Hustisia.

E blokeo struktural aki den formashon di un Hunta di Komisarionan pa CBCS ku ta funshoná bon, i e impasenan atministrativo i polítiko ku ta asosiá ku esaki, oviamente ta stroba e funshonamentu efektivo di e banko sentral kompartí i asta a hiba Parlamento di Kòrsou na konkluí den un deklarashon di 13 di febrüari último ku e banko sentral di Kòrsou i Sint Maarten ta un forma di kooperashon imponé den Reino despues di 10-10-10 ku no ta eksitoso.

E situashon aki ta insostenibel, miéntras ku, manera menshoná, Kòrsou ta representá mas o ménos 80% di e interes ekonómiko den CBCS. Ademas, Kòrsou tin e parti mas grandi den e sektor finansiero supervisá dor di CBCS denter di e union monetario. Esaki ta pone un responsabilidat spesial riba Gobièrnu di Kòrsou pa ku mantenshon di e stabilidat i bon funshonamentu di CBCS komo e outoridat monetario i supervisor prudensial di e sektor finansiero.

Bisando esei, Gobièrnu ta konstatá ku e situashon ku a surgi ta relashoná solamente ku e struktura di maneho di e kooperashon entre e paisnan i esaki no tin ningun impakto riba e stabilidat di e florin karibense, ni riba e efektividat i kontinuidat di e supervishon di CBCS i e funshonamentu di e sistema finansiero. Ta importante pa Gobièrnu di Kòrsou ku esaki keda asina tambe den futuro.

Pronto Gobièrnu lo drenta den konsulta ku Parlamento di Kòrsou pa sondia su opinion riba e próksimo pasonan di Gobièrnu riba e tema aki.