SOROPTIMIST INTERNATIONAL CLUB CURAÇAO Geraldine Christina ta “Muhé Balente 2026” di Soroptimist Club Curaçao
SOROPTIMIST INTERNATIONAL CLUB CURAÇAO
Geraldine Christina ta “Muhé Balente 2026” di Soroptimist Club Curaçao
Willemstad – Soroptimist International Club Curaçao (SICC) a nombrá Geraldine Christina komo “Muhé Balente 2026” den kuadro di selebrashon di Dia Internashonal di Hende Muhé, 8 di mart. Christina ta risibí e prestigioso rekonosimentu pa su dedikashon, perseveransia i inspirashon den su trabou boluntario den diferente organisashon i den komunidat di Kòrsou.
E rekonosimentu ta bai pa un hende muhé ku su aktividatnan ta kontribuí na metanan di SICC i ku a demostrá kompromiso duradero den temanan di importansia sosial, manera edukashon i desaroyo, siguridat di kuminda i salubridat, medio ambiente i naturalesa, i empoderamentu di hende muhé. Aktividatnan ku ta konsiderá mester tin karakter no-komersial i benefisiá un grupo representativo di e komunidat.
Geraldine Christina a demostrá durante hopi aña su dedikashon na servisio di komunidat. For di 2002 te presente e ta aktivo den Asosiashon di Guia Curaçao (AGC), kaminda el a sirbi den bestür, guia hóbennan i duna entrenamentu na lidernan nobo. Desde 2019 e ta miembro di Soroptimist International Club Curaçao, kaminda el a okupá diferente puesto den direktiva, entre otro esun di sekretaria. El a enkabesá tambe proyektonan komunitario manera e proyekto di Planta Palu i “E Timon den bo mes man”, enfoká riba empoderamentu di hende muhé i promoviendo kuminda salú.
Den Parokia di Wishi, kaminda e ta konosí komo Gera, e ta un pilar fundamental den bida di e parokia. E ta guia e sekretariado, finansas i e parti pastoral sosial, i ta kontribuí na diferente aktividat pastoral. Christina ta hiba komunion pa grandinan i pa esnan ku no por asistí na misa. Konosí komo un persona di poko palabra pero di hopi akshon, semper kla pa skucha, duna konseho i yuda esnan ku ta buska apoyo. Pa su dedikashon i su abilidat pa mobilisá donashonnan material, hopi hende den komunidat di Wishi a haña sosten. E ta representá Parokia di Wishi den Caritas tambe.
Kada aña SICC ta duna rekonosimentu di e “Muhé Balente” na un hende muhé ku a sobresalí den su kontribushon na komunidat. Na mart 2014 pa promé biaha só a nombrá dos persona ku a destaká ku tabata sra. Jenny Francisco-Gregorio (promé hendé muhé Loods) i e otro sra. Shirley Martis-Treurniet (miembro). Despues for di 2015 e atenshon a bai na un miembro di e organisashon i e siguiente aña na un hende muhé pafó di e organisashon.
