Eksitoso promé dia di distribushon di karchi nobo di banko pa kobradónan di ònderstant

WILLEMSTAD – Djárason 11 di mart 2026, e distribushon di e karchinan di banko nobo pa kobradónan di ònderstant na Sambil a start ku éksito. For di mainta trempan, klientenan a presentá pa buska nan karchi nobo di Banco di Caribe, kual entrante 1 di aprel próksimo, lo fungi komo e banko di kas nobo pa Gobièrnu di Kòrsou.

E promé dia tabata dediká na e personanan ku nan fam ta kuminsá ku e lèternan A i B. Klientenan presente a ekspresá di ta masha satisfecho ku e servisio risibí na e stèntnan di Ministerio di Desaroyo Sosial, Labor i Bienestar (SOAW) i Banco di Caribe. Un bentaha grandi ku hopi a menshoná ta e posibilidat nobo pa por wak nan saldo i hasi pagonan online. Pa fasilitá esnan ku no tin transporte propio, tabatin un bùs di Banco di Caribe disponibel for di Otrobanda ku a transportá e klientenan te na e entrada di Sambil na Caracasbaai.

Informashon importante pa e próksimo dianan:
E distribushon ta kontinuá te ku dia 20 di mart 2026, tur dia di 8:00 am te ku 18:00 pm segun sekuensia di fam:

• Djaweps 12 di mart 2026: kobradónan di kual nan fam ta kuminsá ku C i D
• Djabièrnè 13 di mart 2026: kobradónan di kual nan fam ta kuminsá ku E, F i G
• Djaluna 16 di mart 2026: kobradónan di kual nan fam ta kuminsá ku H, I, J, K i L
• Djamars 17 di mart 2026: kobradónan di kual nan fam ta kuminsá ku M
• Djárason 18 di mart 2026: kobradónan di kual nan fam ta kuminsá ku N, O, P, Q i R
• Djaweps 19 di mart 2026: kobradónan di kual nan fam ta kuminsá ku S, T, U i V
• Djabièrnè 20 di mart 2026: kobradónan di kual nan fam ta kuminsá ku W, X, Y i Z

SOAW ta kòrda tur kliente pa trese nan identifikashon bálido (sédula, reibeweis òf pasport). Den kaso ku e persona ta kasá, mester trese e trouwboek tambe. Sin e dokumentonan aki, no por otorgá e karchi.
Pa e klientenan ku no por presentá riba nan dia stipulá, nan mester tuma kontakto ku nan Kas di Bario pa haña un fecha nobo.

Pa mas informashon por tuma kontakto ku e Kasnan di Bario via telefòn òf WhatsApp:
Punda/Banda Ariba: 724-5251 / 562-7629
Brievengat: 724-5252 / 563-7629
Otrobanda/Banda Abou: 724-5253 / 564-7629
Sta. Maria: 724-5254 / 565-7629