17 aspirante di Seguridat na SDKK a risibí na diploma di Basis Beroepsopleiding Beveiliger.

17 aspirante di Seguridat na SDKK a risibí na diploma di

Basis Beroepsopleiding Beveiliger.

 WILLEMSTAD: Djaweps 12 di mart 2026, a tuma lugá e seremonia di entrega di diploma na 17 aspirante di Seguridat na Sentro di Detenshon i Korekshon Kòrsou. 

E grupo di aspirante di Seguridat a sigui e estudio di Basis Beroepsopleiding Beveiliger (BBB) for di aña 2024 i e estudio aki a keda fasilitá dor di ORV. 

E estudio di BBB tabata kontené un parti teorétiko i tambe práktiko kaminda e aspirante tabata traha i alabes bai skol, esta Leer en Werk Opleiding.

 

Na e okashon di e seremonia aki a hiba palabra señor Ronald Richardson den representashon di señor Stanley Maduro komo Sector Manager Initiële opleidingen, señora Alpha Falbru komo direktora di ORV, señor Anthony Hasselmeijer komo direktor suplente di SDKK i tambe Minister di Hustisia señor Shalten Hato ku a hasi entrega ofisial di e diploma na e 17 aspirante di seguridat. Tambe a rekonosé i pone den spòtlait aspirante  di seguridat Pereira B. di Klas 2024-1 i aspirante di seguridat  Sprockel Q. di klas 2024-2 ku a sali ‘bèst geslaagde’ di e estudio di BBB.

 

Mas aleu durante e seremonia a hasi entrega di karnèt di sertifikashon na 11 personal di prizòn ku a sigui e kurso básiko pa manehá un fòrklift. Na e okashon aki señora Zairitsa Ignatia a hiba palabra dunando tur presente un splikashon di e trayekto aki.

 

E seremonia a terminá den ambiente ameno kaminda tur presente por a felisitá e 17 aspirante di seguridat i tambe sosialisá durante e bunita enkuentro aki. Gerensia di prizòn ta sumamente kontentu ku e logronan aki pa ku nos instituto SDKK.