Ultimo dia di Intertraffic 2026 na Amsterdam, Hulanda.

Parlamento di Kòrsou

Djabièrnè, 13 di mart 2026, e último dia di Intertraffic 2026 na Amsterdam, Hulanda.
Riba e delaster dia di e bolsa di tráfiko tambe e delegashon di Parlamento tabata presente pa tuma informashon i papia ku potensial kompanianan ku ta ofresé produktonan interesante pa Kòrsou.
Na promé lugá e delegashon a keda invitá pa ta presente na un seshon di informashon i siguí pa un diskushon di pènel sumamente interesante entre polítikonan riba nivel di munisipio, ámtenarnan haltu, ekspertonan i konseheronan riba tereno di infrastruktura i mobilidat. Presente tabata por ehèmpel Jeroen Olthof, diputado di provinsia Noord-Holland, Jon Eikelenstam, Direktor di Sektor den Ministerio di Infrastruktura i Maneho di Awa, Tanja Vonk, konsehero senior di TNO i Elisabeth Post, Presidente di hunta di maneho di Transport en Logistiek Nederland (TLN).
E diskushon a drai rondó di e pregunta, kon ta bai kombiná e nesesidat grandi di mas bibienda, mas hende, mas outo i mas movishon. Mester buska solushon pa e mobilidat si òf nò? Si ta si, ki tipo di solushon lo por ta faktibel i efisiente? Ta tene kuenta ku mas faktor rondó di krea mas mobilidat, manera e ekosistema?
Di e manera aki a bini diferente pensamentu dilanti ku a duna e delegashon di Parlamento di Kòrsou hopi kuminda pa pensamentu pa posibel akshonnan ku lo por òf mester tuma pa Kòrsou tambe. Tin kos ku ta laga pa merkado mes desaroyá i solushoná i tin otro kosnan ku ta Gobièrnu mester pone na lugá manera regla i lei anto tambe fasilitá. E liña kòrá a tabata ku no hasi nada no ta un opshon.
Seguidamente e delegashon a haña un presentashon spesialmente pa Kòrsou, serka un kompania ku riba nivel mundial ta atendé ku tur loke ta plachi di number di outo i bròmer. E delegashon a hasi pregunta riba tur e posibilidatnan i a keda ku lo sigui e deliberashonnan despues na Kòrsou.
Finalmente e delegashon a bishitá algun “booth” adishonal pa despues konkluí e bishita na e bolsa.