Parlamento di Kòrsou Komishon sentral enkuanto e desaroyonan rondó di e krísis di energia internashonal i posibel konsekuensianan pa Kòrsou. Djabièrnè 20 di mart 2026, Parlamento di Kòrsou a bin huntu den un Komishon Sentral pa deliberá ku Minister di Asuntunan General, Minister di Finansa i Minister di Desaroyo Ekonómiko enkuanto e desaroyonan rondó di e krísis di energia internashonal i posibel konsekuensianan pa Kòrsou.

E reunion a kuminsá ku un introdukshon di Minister di Asuntunan General, sr. Gilmar Pisas tokante e tópiko.

Promé ku Presidente di Parlamento sr. Fergino Brownbill a habri e promé tanda, algun Miembro a hasi petishon pa un ‘vraagpunt’. Esaki ta duna e parlamentario e oportunidat di hasi pregunta òf pidi klarifikashon riba un punto ku no por warda te ora e tanda di papia kuminsá.

Despues, Miembro di Parlamento sr. David Seferina, a presentá un proposishon di òrdu. Den esaki, sr. Seferina a pidi pa skòrs e reunion pa duna Gobièrnu di Kòrsou e espasio pa formulá diferente posibel senario pa mitigá eventual efektonan di e krísis di energia internashonal. Pa basá riba e posibel senarionan, reanudá e reunion, pa Parlamento por duna direkshon i sosten lokual keda presentá. Parlamento a bai di akuerdo ku e proposishon di òrdu. Konsekuentemente Presidente di Parlamento sr. Fergino Brownbill a skòrs e reunion te un próksimo aviso.