ARUBA: Gobierno ta explora colaboracion cu fundacion internacional pa fortalece cuido pa personanan cu discapacidad
Gobierno ta explora colaboracion cu fundacion internacional pa fortalece cuido pa personanan cu discapacidad
Prome Minister Mike Eman, Minister Wendrick Cicilia y Sonaly Acosta di Ministerio di Asuntonan General, a reuni recientemente na Bestuurskantoor cu Sra. Jane King, CEO di Amadiba, un fundacion (NGO) basa na Mallorca, Spaña, cu ta dedica na cuido y acompañamento di personanan cu discapacidad durante tur fase di nan bida.
Durante e encuentro, a discuti posibilidadnan pa establece colaboracion cu Aruba, cu enfoke riba introduccion di servicio integral pa personanan cu discapacidad, for di nacimento te edad adulto y etapa final di bida. Amadiba ta brinda un amplio gama di servicio, incluyendo educacion, daycare, vivienda, deporte y asistencia legal (tutela).
E fundacion tin experiencia significativo, atendiendo mas cu 2.000 cliente y contando cu un ekipo di aproximadamente 635 empleado.
E iniciativa di colaboracion a surgi despues di un bishita anterior di Brighter Future na Mallorca durante luna di november, unda a conoce e modelo di trabou di Amadiba. Como siguiente paso, e delegacion a bishita Aruba pa presenta e concepto na diferente ministerionan.
Gobierno di Aruba ta mira e dialogo aki como un oportunidad pa explora con por fortalece y amplia e servicio existente pa personanan cu discapacidad, den colaboracion cu experto internacional.
E encuentro ta forma parti di un esfuerso continuo pa promove inclusion y bienestar social, mientras cu ta evalua posibilidadnan pa adaptacion di modelo exitoso na contexto local.
